पाकिस्तानचे माजी पंतप्रधान इम्रान खान यांना 10 वर्ष तुरुंगवासाची शिक्षा

author img

By ETV Bharat Marathi Team

Published : Jan 30, 2024, 5:00 PM IST

Etv Bharat

Imran Khan : पाकिस्तानचे माजी पंतप्रधान इम्रान खान यांना पाकिस्तानच्या गोपनीयता कायद्याचं उल्लंघन केल्याबद्दल 10 वर्षांच्या तुरुंगवासाची शिक्षा सुनावण्यात आली आहे. त्यामुळं इम्रान खान यांची राजकीय कारकीर्द संपल्याचं बोललं जात आहे.

नवी दिल्ली Imran Khan : पाकिस्तानचे माजी पंतप्रधान इम्रान खान तसंच माजी परराष्ट्र मंत्री शाह मेहमूद कुरेशी यांना सायफर प्रकरणात 10 वर्षांची शिक्षा सुनावण्यात आली आहे. इम्रान खान सत्तेत असताना त्यांच्यावर पाकिस्तानच्या गोपनीयतेच्या कायद्याचं उल्लंघन केल्याचा आरोप होता. मंगळवारी (३० जानेवारी) विशेष न्यायालयाचे न्यायाधीश अबुल हसनत जुलकरनैन यांच्यासमोर या प्रकरणाची सुनावणी झाली. शिक्षा सुनावण्यात आली तेव्हा इम्रान खान, शाह मेहमूद कुरेशी कोर्टरूममध्ये उपस्थित होते. त्यानंतर न्यायालयानं हा निकाल दिला आहे.

पाकिस्तानच्या राजकारणात खळबळ : इम्रान खानसह त्यांचे सहकारी माजी परराष्ट्र मंत्री शाह मेहमूद कुरेशी यांनाही दहा वर्षांच्या तुरुंगवासाची शिक्षा सुनावण्यात आली आहे. आगामी लोकसभा निवडणुकीच्या पार्श्वभूमीवर इम्रान खान यांच्यासाठी हा मोठा धक्का मानला जात आहे. त्यामुळं पाकिस्तानच्या राजकारणात खळबळ उडाली आहे. न्यायालयाच्या या निर्णयामुळं इम्रान खान यांच्या समर्थकांमध्ये अस्वस्थता पसरली आहे. या निर्णयाविरुद्ध उच्च न्यायालयात अपील करण्याची परवानगी देण्यात आली आहे. इम्रान खान यांच्या पाकिस्तान तेहरीक-ए-इन्साफनं पक्षानं (पीटीआय) या निर्णयाला आव्हान देण्याचा निर्णय घेतला आहे.

आमचे नेते परत येतील : संपूर्ण पाकिस्तान इम्रान खानसह शाह मेहमूद कुरेशी यांच्या मागे उभा आहे. ज्यांनी पाकिस्तानला वाचवण्यासाठी तसंच स्वातंत्र्यासाठी लढा दिलाय, असं इम्रान खान यांच्या पक्षानं म्हटलं आहे. आमचे नेते लवकरच परत येईल. हा निर्णय उच्च न्यायालयात अजिबात टिकणार नाही, असा विश्वास पीटीआयनं व्यक्त केला आहे.

इम्रान खान यांच्या पक्षावर बंदी येणार? : इम्रान खान यांना शिक्षा सुनावल्यानंतर त्यांचा पक्ष 'पाकिस्तान तहरीक-ए-इन्साफ'वर (पीटीआय) बंदी घातली जाऊ शकते, अशी चर्चा पाकिस्तानी माध्यमांमध्ये सुरू आहे. पाकिस्तानच्या निवडणूक आयोगानं (ECP) गेल्या वर्षी पाकिस्तान तहरीक-ए-इन्साफला 'बेहिशेबी निधी' मिळाल्याच्या आरोप केला होता.

हे वाचलंत का :

  1. किम जोंग यांनी वाढविला तणाव! दक्षिण कोरियानं डिवचल्यानंतर घेतली क्रूझ क्षेपणास्त्राची चाचणी
  2. मालदीवच्या संसदेत तुफान राडा, खासदारांनी एकमेकांना लाथा-बुक्क्यांनी हाणलं! पाहा व्हिडिओ
  3. अज्ञात हल्लेखोरांकडून इराणमध्ये 9 पाकिस्तानी नागरिकांची हत्या; दोन देशांमध्ये पुन्हा वाढणार तणाव
ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.