इस्लामाबाद Pakistan Election : पाकिस्तानमधील निवडणुकीचे अंतिम निकाल जाहीर झाले आहेत. माजी पंतप्रधान इम्रान खान यांचा पक्ष पीटीआयनं (पाकिस्तान तहरीक-ए-इंसाफ़) पाठिंबा दिलेल्या अपक्ष उमेदवारांनी 100 हून अधिक जागा जिंकल्या. दरम्यान, पीटीआयचे कार्यकर्ते देशभरात निदर्शनं करत आहेत. निवडणुकीत हेराफेरी झाल्याचा त्यांचा आरोप आहे. निदर्शनांदरम्यान, निवडणूक आयोगानं 15 फेब्रुवारी रोजी काही जागांवर पुन्हा निवडणूक घेण्याची घोषणा केली.
अपक्षांनी 100 हून अधिक जागा जिंकल्या : निवडणूक आयोगाच्या मते, पीटीआय समर्थित अपक्ष उमेदवारांनी 100 हून अधिक जागा जिंकल्या. अंतिम निकालात नवाझ शरीफ यांचा पक्ष पाकिस्तान मुस्लिम लीग-नवाझला (पीएमएल-एन) 72 जागा मिळाल्या आहेत. तर बिलावल भुट्टो झरदारी यांच्या नेतृत्वाखालील पाकिस्तान पीपल्स पार्टीनं (पीपीपी) 54 जागा जिंकल्या. इतर लहान पक्षांनी एकत्रितपणे 27 जागा जिंकल्या आहेत. ते कोणत्याही युती सरकारच्या स्थापनेत महत्त्वाची भूमिका बजावू शकतात.
दोन्ही नेत्यांचा विजयाचा दावा : पीएमएल-एनचे अध्यक्ष आणि माजी पंतप्रधान नवाझ शरीफ यांनी देखील विजयाचा दावा केला आहे. त्यांचा पक्ष 'सर्वात मोठा पक्ष' असल्याचं ते म्हणाले. मात्र, आपल्याला बहुमत मिळालं नसल्याचं मान्य करत त्यांनी आघाडी सरकार स्थापन करण्यासाठी मित्रपक्षांना आमंत्रित केलंय. दुसरीकडे, तुरुंगात असलेले माजी पंतप्रधान इम्रान खान यांनीही विजयाचा दावा केला आहे. इम्रान खान यांच्यासाठी ही निवडणूक करो किंवा मरो सारखी होती, जिथे त्यांच्या पक्षानं पाठिंबा दिलेल्या अपक्ष उमेदवारांनी चमकदार कामगिरी केली आहे. इम्रान खान यांच्या पक्षावर निवडणूक आयोगानं बंदी घातली होती. पीटीआय समर्थित अपक्षांना बहुमत मिळूनही, ते पाकिस्तानच्या निवडणूक कायद्यानुसार सरकार बनवू शकत नाहीत. निकाल जाहीर झाल्यापासून तीन दिवसांत त्यांना पक्षात सामील होऊन सरकार स्थापन करावं लागेल. अपक्ष उमेदवारांना राष्ट्रीय असेंब्लीच्या 70 राखीव जागाही मिळू शकत नाहीत.
133 जागांची आवश्यकता : पाकिस्तानात सरकार स्थापन करण्यासाठी पक्षाला राष्ट्रीय असेंब्लीच्या 265 जागांपैकी 133 जागांची आवश्यकता असते. एका उमेदवाराच्या मृत्यूमुळे त्या जागेवरील निवडणूक पुढे ढकलण्यात आली होती. नॅशनल असेंब्लीमधील 70 जागा महिला आणि अल्पसंख्याकांसाठी राखीव आहेत. त्या जागांचं निवडून आलेलं सरकार पक्षाच्या संख्यात्मक ताकदीनुसार वाटप करते. उदाहरणार्थ, पाकिस्तान नॅशनल असेंब्लीमध्ये एकूण खासदारांची संख्या 336 आहे आणि बहुमताचा आकडा 169 जागा आहे.
बॅलेट पेपरद्वारे निवडणुका : पाकिस्तानमध्ये बॅलेट पेपरद्वारे निवडणुका घेण्यात आल्या. परंतु पाकिस्तानचे अध्यक्ष आरिफ अल्वी म्हणाले की, त्यांचा पक्ष पीटीआयनं इलेक्ट्रॉनिक मतदान यंत्रांच्या (ईव्हीएम) समर्थनासाठी लढाई लढली आहे. ते म्हणाले की, 8 फेब्रुवारीच्या निवडणुकीत ईव्हीएमचा वापर केला असता तर अशी अनिश्चितता टाळता आली असती. अमेरिका, ब्रिटन आणि युरोपियन युनियननं पाकिस्तानच्या सार्वत्रिक निवडणुकीत हेराफेरी आणि फसवणुकीच्या दाव्यांवर चिंता व्यक्त केली आहे. त्यांनी स्वतंत्र आणि निष्पक्ष तपास करण्याचं आवाहन केलंय.
हे वाचलंत का :
