गुजरात किनारपट्टीवर संशयित इराणी बोट ताब्यात; 1000 कोटींपेक्षा अधिकचे अंमली पदार्थ जप्त

अहमदाबाद Iranian Boat Caught off Gujarat Coast : गुजरातच्या दहशतवाद विरोधी पथकानं मंगळवारी भारतीय नौदल आणि नार्कोटिक्स कंट्रोल ब्युरो (NCB) यांच्या संयुक्त कारवाईत गुजरातच्या किनारपट्टीवर संशयित इराणी बोट पकडली. या बोटीतून 1000 कोटी रुपयांपेक्षा जास्त किमतीचं चरस आणि इतर अंमली पदार्थ बाळगणाऱ्या त्या बोटीच्या चार इराणी सदस्यांना ताब्यात घेतल्याची माहिती एका सूत्रांनी दिली.

3300 किलो अंमली पदार्थ जप्त : गुजरात एटीएसच्या वरिष्ठ अधिकाऱ्यानं अंमली पदार्थांच्या बाबत माहिती दिली. ते म्हणाले की, "समुद्रात करण्यात आलेल्या कारवाईत बोटीतून चरससह विविध प्रकारच्या अंमली पदार्थांची मोठी खेप जप्त करण्यात आलीय. ही बोट किनाऱ्याच्या दिशेनं आणली जात असून आज पोरबंदरला पोहोचण्याची शक्यता आहे. अंदाजे 1,000 कोटी रुपयांचे 3300 किलो ड्रग्ज जप्त करण्यात आले आहेत. आज नार्कोटिक्स कंट्रोल ब्युरो पत्रकार परिषद घेऊन अधिकृत तपशील जाहीर करेल." याप्रकरणी गुजरात एटीएसच्या एका वरिष्ठ अधिकाऱ्यानं सांगितलं की, "समुद्राच्या मध्यभागी केलेल्या कारवाईदरम्यान बोटीतून मोठ्या प्रमाणात चरससह विविध अंमली पदार्थ जप्त करण्यात आलंय."

काही दिवसांपूर्वीच 300 कोटी रुपयांचे ड्रग्ज जप्त : पकडलेल्या क्रू मेंबर्ससह बोट किनाऱ्यावर आणली जातेय. विशेष म्हणजे तीन दिवसांपूर्वी वेरावळ बंदरातून एका मासेमारी बोटीतून 300 कोटी रुपयांचं ड्रग्ज जप्त करण्यात आलं होतं. एवढ्या मोठ्या प्रमाणात अंमली पदार्थांचा साठा कसा आला, कोणी पाठवला आणि अंमली पदार्थांचा धंदा कोण चालवत होता, याबाबत आज धक्कादायक खुलासे होऊ शकतात, अशी शक्यता वर्तवली जात आहे.

हेही वाचा :

1. ड्रग्ज तस्करीत लंबा बाल, मुंबई का बंदर अन् नमक पार्सल; डोक्याचा भुगा करणारी तस्करांची नावं झाली उघड