चंदीगड : मद्यपान आरोग्यासाठी हानिकारक असल्याचे मद्याच्या बाटल्यांवर नमूद करण्यात आले आहे. मात्र तरीही नागरिक मोठ्या प्रमाणात मद्यपान करत असल्याचे दिसून येते. मात्र मद्यपान केवळ आपल्या अवयवांनाच हानिकारक नाही, तर अति मद्यपानामुळे स्त्री पुरुषांमध्ये वंध्यत्व येत असल्याचा दावा संशोधकांनी केला आहे. अनेक वेळा मद्यपान हा गर्भपाताचे कारण असल्याचेही या संशोधकांनी स्पष्ट केले आहे. वंध्यत्वाचे निदान केलेल्या 35 टक्के पुरुष आणि स्त्रियांमध्ये मद्यपान हे प्रमुख कारण असल्याचे चंदीगड येथील डॉ. वंदना नरुला यांनी केलेल्या संशोधनातून स्पष्ट झाले आहे.
अतिमद्यपानाचा शुक्राणूंवर होतो परिणाम : मद्यपान करणे ही जगभरातील स्त्री पुरुषांची सामान्य सवय झाली आहे. परंतु मद्याच्या अतिसेवनामुळे अनेक दुष्परिणाम होतात. नियमितपणे अतिमद्यपान केल्याने शुक्राणूंवर परिणाम होतो. आठवड्यातून 14 किंवा अधिक वेळा मद्यपान केल्याने टेस्टोस्टेरॉनची पातळी कमी होऊ शकते. त्यामुळे शुक्राणूंच्या संख्येवर परिणाम होत असल्याचा दावा या संशोधकांनी केला आहे. मद्यपान शुक्राणूंची संख्या, आकार, गतिशीलता बदलून प्रजननक्षमतेवर परिणाम करू शकते, असा दावा या संशोधनात करण्यात आला आहे.
गर्भधारणेचा प्रयत्न करणे विनाशकारी अनुभव : अति मद्यपान करणाऱ्या जोडप्यांनी गर्भधारणेचा प्रयत्न करणे हा एक विनाशकारी अनुभव असू शकतो. एका जोडप्याने अलीकडेच सोशल मीडियावर त्यांची हृदयद्रावक कहाणी शेअर केली आहे. यात त्यांनी अतिमद्यपानामुळे त्यांच्या वैवाहिक जीवनावर कसा परिणाम झाला याबाबत सांगितले आहे. अतिमद्यपानामुळे पतीच्या शुक्राणूंची संख्या कमी होती, त्यासह शुक्राणूंची गुणवत्ता खराब होती. वैद्यकीय तज्ञांशी सल्लामसलत केल्यानंतर त्याला मद्यपान कमी करण्याचा सल्ला देण्यात आला. त्यामुळे त्याच्या शुक्राणूंची संख्या आणि गुणवत्ता सुधारल्याचा दावा या संशोधनात करण्यात आला आहे.
मद्यपानाचा होतो प्रजनन क्षमतेवर परिणाम : मद्यपानाचा स्त्री-पुरुषांच्या प्रजनन क्षमतेवर परिणाम होत असल्याचा दावा या संशोधनात करण्यात आला आहे. 40 युनिट्सपेक्षा जास्त मद्यपान करणाऱ्या पुरुषांमध्ये 33 टक्के घट झाली आहे. त्यामुळे अल्कोहोल अंडाशयांचे कार्य रोखू शकते, शुक्राणूंना योग्यरित्या विकसित होण्यापासून रोखते आणि शुक्राणूंची अंड्याकडे जाण्याची क्षमता कमी करत असल्याचा दावाही या संशोधनात करण्यात आला आहे.
मद्यपानामुळे शुक्राणूंच्या आकारावर होतो परिणाम : चंदीगडच्या आयव्हीएफ ( IVF ) आणि वंध्यत्वाच्या वरिष्ठ सल्लागार डॉ. वंदना नरुला यांनी या अभ्यासातून अनेक खुलासे केले आहेत. त्यांच्याकडे आलेल्या जोडप्यांचा वैद्यकीय इतिहास पाहिला त्यामध्ये 40 ते 50 टक्के रुग्णांमध्ये शुक्राणूंची कमतरता असल्याचे दिसून आल्याचे त्यांनी स्पष्ट केले आहे. त्यासह या जोडप्यांमध्ये शुक्राणूंचा आकार अनियमित असल्याचा दावाही नरुला यांनी केला आहे. गेल्या 14 वर्षात जगभरात शुक्राणूंची संख्या कमी होण्याच्या घटनांमध्ये सातत्याने वाढ होत आहे. अतिमद्यपान केल्याने शुक्राणूंची मूल निर्माण करण्याची क्षमता नष्ट होते. पुरुषांच्या प्रजनन क्षमतेवर मद्यपानाचा परिणाम होत असल्याने जागरूकता करणे आवश्यक असल्याचेही त्यांनी यावेळी स्पष्ट केले आहे.
हेही वाचा - Omicron Sub Variants : ओमिक्रॉनचा सबव्हेरियंट शरीराच्या रोगप्रतिकारक शक्तीतून कसा पडतो बाहेर, जाणून घ्या सविस्तर माहिती
