ठाणे : महाराष्ट्र राज्यात आरोग्यास घातक असलेला सुगंधी तंबाखू व गुटखा विक्रीस प्रतिबंध असतानाही गुजरात राज्यातून विविध चोरट्यामार्गे आयात केला जातो. कोट्यवधी रुपयांच्या गुटख्याची आणि पान मसाल्याची दररोज तस्करी केली जाते. त्याविरोधात अन्न व औषध प्रशासनाने धडक कारवाई हाती घेतली आहे. यादरम्यान भिवंडी शहरातील दोन इमारतींमधून सव्वा पाच लाखांचा गुटखा अन्न व औषध प्रशासनाने जप्त केला आहे.
खाडीपार भागात पथकाची छापेमारी : गुजरात राज्यातून प्रतिबंधित गुटखा पान मसाल्याची भिवंडीतील रहिवासी इमारतीमध्ये साठवणूक करून त्याची अवैध विक्री करण्यासाठी येणार असल्याची खबर अन्न व औषध प्रशासनाला २३ जुलै रोजी मिळाली होती. त्या माहितीनुसार भिवंडी शहरातील खाडीपार येथील क्रांतीनगर परिसरातील कलाम इमारतीमधील पहिल्या मजल्यावर विभागाच्या पथकाने छापा टाकून झडती घेतली. यावेळी येथे अवैध, प्रतिबंधित गुटखा, पानमसाला व तंबाखूजन्य पदार्थ असल्याचे निदर्शनास आले. हा संपूर्ण माल जप्त करण्यात आला असून याची किंमत ३ लाख ८९ हजार रुपये आहे. या प्रकरणी एका अज्ञात व्यक्तीच्या विरोधात विविध कलमांन्वये निजामपुरा पोलीस ठाण्यात गुन्हा दाखल करण्यात आला आहे.
सव्वा पाच लाखांचा गुटखा जप्त : याचप्रमाणे ५ जुलै रोजी निजामपुरा पोलीस आणि अन्न सुरक्षा अधिकारी यांच्या संयुक्त कारवाईत खाडीपार परिसरातील अमीनखान बिल्डिंगमधील पाकिजा सुपारी अँड जनरल स्टोअर्स दुकानावर छापेमारी करण्यात आली. यामध्ये १ लाख ३८ हजार ४१० रुपये किमतीच्या प्रतिबंधित गुटख्याची साठवणूक करण्यात आली होती. या प्रकरणी अन्न व औषध प्रशासनाचे भरत चांद्या वसावे यांच्या तक्रारीवरून गाळा मालक रेहान अबुसालीम खान याच्या विरोधात विविध कलमांन्वये गुन्हा दाखल करण्यात आला होता. त्यामुळे एकाच महिन्यात ५ लाख २७ हजार ४१० रुपये किमतीच्या सुगंधित गुटख्याचा घबाड सापडल्याने गुटखा तस्करांमध्ये एकच खळबळ उडाली आहे. भिवंडीतील रहिवासी इमारती गुटखा तस्करांसाठी गुटख्याच्या साठवणुकीकरिता अड्डा बनत असल्याचे या कारवाईतून उघड झाले आहे.
हेही वाचा:
