घराणेशाहीची व्याख्या उद्धव ठाकरेंनी सांगावी; मुख्यमंत्री एकनाथ शिंदेंचा निशाणा, स्वच्छता मोहिमेची सुरुवात

author img

By ETV Bharat Marathi Desk

Published : Jan 13, 2024, 8:52 PM IST

Chief Minister Eknath Shinde

CM Eknath Shinde : “घराणेशाहीची व्याख्या उद्धव ठाकरेंनी सांगितली पाहिजे,” असा प्रश्न मुख्यमंत्री एकनाथ शिंदे यांनी उद्धव ठाकरेंना केलाय. आज मुख्यमंत्र्यांच्या हस्ते कौपिनेश्वर मंदिर परिसरात स्वच्छता मोहीम सुरू करण्यात आली. त्यानंतर मुख्यमंत्र्यांनी उद्धव ठाकरेंवर टीकास्त्र सोडलंय.

मुख्यमंत्री एकनाथ शिंदे यांची प्रतिक्रिया

ठाणे CM Eknath Shinde : पंतप्रधान नरेंद्र मोदी यांनी स्वच्छता मोहीम अभियानांतर्गत देशाला स्वच्छतेची सवय लावली. त्याचवेळी महाराष्ट्र सरकारनं देखील स्वच्छता मोहीम सुरू केलीय. त्यामुळं राज्याला स्वच्छतेत देशात प्रथम क्रमांक मिळाला, असं मुख्यमंत्री एकनाथ शिंदे यांनी म्हटलंय. त्यांनी आज ठाण्यातील कौपिनेश्वर मंदिरात स्वच्छता मोहीमेची सुरवात केलीय. त्यानंतर त्यांनी माध्यमांशी संवाद साधला.

प्रदूषणाला आळा : महाराष्ट्रातील प्रदूषणानं गेल्या काही महिन्यांतील उच्चांक गाठला आहे. वाढत्या प्रदूषणामुळं नागरिकांना श्वसनाचं विकार होऊन परिस्थिती गंभीर बनलीय. मात्र, पंतप्रधान नरेंद्र मोदी यांच्या स्वच्छ भारत मोहिमेला मिळालेल्या उदंड प्रतिसादामुळं प्रदूषणाला आळा बसण्यास मदत झाल्याचं शिंदे यांनी म्हटलंय.

मुख्यमंत्र्यांच्या हस्ते स्वच्छता मोहिमेची सुरवात : त्याचवेळी राष्ट्रपती द्रौपदी मुर्मू यांच्या हस्ते स्वच्छ भारत अभियानांतर्गत महाराष्ट्रला प्रथम क्रमांक मिळाला. त्यामुळं महाराष्ट्रात डीप क्लीन ड्राइव्हची घोषणा केली. आज या अभियानाचा शुभारंभ कौपिनेश्वर मंदिरापासून सुरू करण्यात आला. यावेळी मुख्यमंत्र्यांनी नेहमीप्रमाणे कौपिनेश्वरांची पूजा करून महाआरती केली. स्वच्छता मोहिमेमुळं देशातील नागरिकांना स्वच्छतेचं महत्त्व कळलं असून त्यामुळं महाराष्ट्रातील प्रदूषणाची पातळी 300 वरून 100 वर आलीय, असं मुख्यमंत्री म्हणाले. ठाण्यातील पुरातन समजल्या जाणाऱ्या किपोनेश्वर मंदिरात आज मुख्यमंत्री एकनाथ शिंदे यांनी स्वच्छता मोहीम राबवली. यावेळी त्यांच्यासोबत महापालिका आयुक्त अभिजित बांगरही होते. राज्य सरकार सर्व मंदिरे, शहरातील स्वच्छतेवर भर देत असल्यानं विशेष स्वच्छता मोहीम राबविण्यात येत आहे. शासनानं हाती घेतलेल्या सखोल स्वच्छता अभियानात मुख्यमंत्री अनेक ठिकाणी जाऊन स्वत: स्वच्छता करत आहेत.

ठाकरे, शिंदे यांचा ताफा सोबत : आज मुख्यमंत्री ठाण्यात येत असताना विक्रोळीजवळ उद्धव ठाकरे तसंच एकनाथ शिंदे यांच्या गाड्यांचा ताफा जवळजवळ आला. त्यानंतर शिंदेंचा ताफा ठाकरेंच्या ताफ्याला मागे टाकत पुढं सरकला. गेल्या वर्षांपासून उद्धव ठाकरेंच्या गाड्यांमागे एकनाथ शिंदे यांची वाहनं दिसत होती, मात्र सत्ताबदलानंतर हे चित्र पलटलंय.

मुख्यमंत्र्यांनी दिलं प्रत्यूत्तर : पंतप्रधान नरेंद्र मोदी यांनी शुक्रवारी ‘घराणेशाही’वर केलेल्या वक्तव्यामुळं आरोप-प्रत्यारोप सुरू झाले आहेत. “कल्याण-डोबिंवलीतील गद्दारांच्या घराणेशाहीवर पंतप्रधान बोलले नाहीत,” असा हल्लाबोल शिवसेना उद्धव ठाकरे यांनी केला होता. याला मुख्यमंत्री एकनाथ शिंदे यांनी प्रत्युत्तर दिलं आहे. “घराणेशाहीची व्याख्या उद्धव ठाकरेंनी सांगितली पाहिजे,” असा प्रश्न मुख्यमंत्र्यांनी ठाकरेंना विचारलाय.

हेही वाचा -

  1. मल्लिकार्जुन खरगे 'इंडिया' आघाडीचे समन्वयक, नितीश कुमारांची माघार
  2. नोटीसवर नोटीस! अरविंद केजरीवाल यांना ईडीने पाठवली चौथ्यांदा नोटीस
  3. अर्जुन खोतकर यांना दिलासा; साखर कारखाना खरेदी विक्री प्रकरणात पीएमएलए न्यायालयाचा अटकपूर्व जामीन मंजूर
ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.