सातारा- कराडचे प्रवेशद्वार असलेल्या कोल्हापूर नाक्यावर नगरसेवक आणि आरोग्य कर्मचार्‍यांनी स्वच्छता अभियान राबवून ४ ट्रॉली कचरा गोळा केला. याद्वारे नगरपालिकेने स्वच्छ सर्वेक्षण स्पर्धेच्या तयारीचा शुभारंभ केला. तसेच, कराडचे बसस्थानकही चकाचक केले. या उपक्रमात नगराध्यक्षासह नगरसेवक, मुख्याधिकारी, आरोग्य विभागाचे अधिकारी आणि सुमारे २०० कर्मचारी स्वच्छता मोहिमेत सहभागी होते.
कोल्हापूर नाका हा कराडचे प्रवेशद्वार आहे. या ठिकाणी राष्ट्रपिता महात्मा गांधी यांचा पुतळा आहे. त्यामुळे, गांधी जयंतीचे औचित्य साधत गांधी पुतळ्यास अभिवादन करून कराड नगरपालिकेने स्वच्छ सर्वेक्षण स्पर्धेच्या तयारीचा शुभारंभ केला. गांधी पुतळा परिसरासह आशियाई महामार्गाच्या उड्डाणपुलाखालील ४ ट्रॉली कचरा काढण्यात आला. नगरपालिकेतील आरोग्य विभाग, कर विभाग, ड्रेनेज विभाग, पाणीपुरवठा विभागासह लायब्ररी विभागातील कर्मचारी या मोहिमेत सहभागी झाले होते.
नगराध्यक्षा रोहिणी शिंदे, मुख्याधिकारी रमाकांत डाके, आरोग्य सभापती महेश कांबळे, नियोजन सभापती विजय वाटेगावकर, नगरसेवक राजेंद्र माने, नोडल ऑफिसर आर. डी. भालदार, जल अभियंता ए. आर. पवार, निरीक्षक मिलिंद शिंदे, मुकादम मारुती काटरे यांनी आरोग्य कर्मचार्‍यांसमवेत स्वच्छता केली. त्याचबरोबर, कराड बसस्थानक आणि वैकुंठधाम स्मशानभूमीतही स्वच्छता अभियान राबवण्यात आले. स्वच्छता मोहिमेत उत्कृष्ठ काम करणार्‍या कर्मचार्‍यांसह प्रसाद पावसकर, अजित शिंदे, दिलीप इनामदार, शिल्पा वाळिंबे, रमेश पवार, स्नेहल राजहंस या नागरिकांचा नगराध्यक्षा रोहिणी शिंदे यांच्या हस्ते प्रमाणपत्र देवून सत्कार करण्यात आला.
हेही वाचा- कृषी विधेयकावरून काँग्रेस व मित्रपक्ष करतायेत दिशाभूल : रावसाहेब दानवे
