सातारा: भाविकांच्या कारने रस्त्याकडेला थांबलेल्या मालट्रकला पाठीमागून भीषण धडक दिली. सातार्‍यातील पारगाव खंडाळा येथे बुधवारी रात्री पावणे बाराच्या सुमारास हा अपघात झाला आहे.
महिलेसह चिमुकला जागीच ठार: सातार्‍यातून बाळूमामाच्या मेंढरांचे दर्शन घेऊन पुण्यातील भाविक नातेवाईकांसोबत कारने पुण्याकडे निघाले होते. खंडाळा हद्दीत महामार्गाकडेला उभ्या असणार्‍या मालट्रकला भरधाव कारने पाठीमागून जोराची धडक दिली. अपघातात कांचन चंद्रकांत वनशिवे, विरेंद्र चंद्रकांत वनशिवे (रा. वडगाव रासाई, ता.शिरुर, जि. पुणे), अशी मृतांची नावे आहेत. तर संकेत भिमाजी चौधरी (रा. वडगाव रासाई, ता.शिरुर जि. पुणे), स्नेहल पांडुरंग कुलते, अनिल मुक्ताराम कुलते, अंजली अनिल कुलते, परी अनिल कुलते (सर्व रा. अकोला) हे गंभीररीत्या जखमी झालेल्यांची नावे आहेत.
अपघातात कारचा चक्काचूर: पुणे जिल्ह्यातील वडगाव रासाई (ता. शिरुर) येथील वनशिवे कुटुंबीय अकोल्यातील आपल्या नातेवाईकांसोबत सातारा जिल्ह्यामध्ये असणाच्या बाळूमामांच्या दर्शनासाठी कारमधून (क्र.एम. एच.13 एन. 3154) आले होते. दर्शन घेऊन पुण्याला परत जाताना खंडाळा हद्दीत एका हॉटेलसमोर उभ्या असणार्‍या ट्रकला पाठीमागून भरधाव कारने धडक दिली. धडक एवढी भीषण होती की कारचा अक्षरशः चक्काचूर झाला. ट्रकमध्ये अडकलेला कारचा भाग क्रेनच्या मदतीने बाजूला करावा लागला. त्यानंतर कारमधील मृतदेह बाहेर काढता आले. या अपघाताची नोंद खंडाळा पोलीस ठाण्यात झाली आहे.
साताऱ्यात यापूर्वीही कारचा अपघात: कोरेगाव रस्त्यावर जिल्हाधिकारी कार्यालय ते जिल्हा सत्र न्यायालय दरम्यानच्या ओढ्यात कार कोसळल्याची घटना 21 ऑगस्ट, 2021 मध्ये घडली होती. यात घटनेत कोल्हापूरचे दोन जण ठार तर एक जण जखमी झाले होते. अनिकेत कुलकर्णी (वय २८, मंगळवार पेठ, कोल्हापूर) व आदित्य घाटगे (वय २३, कसबा बावडा) अशी मृतांची नावे होती. तर देवराज माळी (वय २१, कसबा बावडा) हा गंभीर जखमी झाला होता.
कार ओढ्यात कोसळली: 20 ऑगस्ट, 2021 ला मध्यरात्री कोल्हापूरचे हे युवक पोवई नाक्याकडून कोरेगावच्या दिशेने कारने जात होते. दरम्यान चालकाचे नियंत्रण सुटल्याने भरधाव कार जिल्हा न्यायालयालगतच्या ओढ्यात कोसळली. सुमारे ३० फूट खोल ओढ्यात कार कोसळल्याने दोघे जागीच ठार झाले. अपघाताची माहिती मिळताच सातारा पोलीस आणि रिक्षाचालकांनी घटनास्थळी एकच गर्दी केली. रात्रीच्या अंधारात ओढ्यात उतरून सर्वांना बाहेर काढण्यात आले. सर्वांना सातारा जिल्हा रुग्णालयात दाखल करण्यात आले होते. तेथे डॉक्टरांनी अनिकेत कुलकर्णी व आदित्य घाटगे यांना मृत घोषित केले. जखमी देवराज माळी याच्यावर उपचार सुरू आहेत. सातारा पोलीस अधिक तपास करत होते.
कारला अज्ञात वाहनाची धडक: रुग्णाला औषध आणण्यासाठी पुण्याहून बेळगावकडे निघालेल्या मारुती सुझुकी कारला अज्ञात वाहनाने 3 डिसेंबर, 2020 रोजी धडक दिली. या भीषण अपघातात कारमधील दोघे जण जागीच ठार झाले असून, तीन जण जखमी झाले आहेत. ही घटना आज पहाटेच्या सुमारास जखिणवाडी (ता. कराड) गाव हद्दीत घडली.
दोघे जागीच ठार: फुलचंद चतुर हे काल आपले नातेवाईक श्रीहरी वाघमारे, बापूसाहेब कांबळे, अश्विनी वाघमारे, रागिनी वाघमारे यांना घेऊन मारुती सुझुकी कारने (एम. एच. 12 एस. क्यू. 1195) पुण्याहून बेळगावकडे निघाले होते. जखिणवाडी गाव हद्दीतील मळाईदेवी पतसंस्थेसमोरील चौकात डाव्या बाजूने आलेल्या अज्ञात वाहनाने कारला जोरदार धडक दिली. या अपघातात श्रीहरी वाघमारे आणि बापूसाहेब कांबळे हे जागीच ठार झाले, तर अश्विनी वाघमारे, रागिनी वाघमारे आणि फुलचंद चतुर हे जखमी झाले. अपघातानंतर अज्ञात वाहन घटनास्थळी न थांबता पसार झाले.
