पुणे - कोरोना आपत्तीमुळे येरवडा कारागृहातून जामिनावर सुटलेल्या सराईत आरोपीने चोरीला विरोध करणाऱ्या तरुणाची हत्या केल्याचा प्रकार उघडकीस आला आहे. स्वारगेट परिसरात 3 सप्टेंबर रोजी हा प्रकार घडला होता. कोणताही पुरावा मागे नसताना पोलिसांनी कौशल्याने तपास करीत आरोपीला गजाआड केले. ऋषिकेष जीवराज कामठे (वय 34) असे अटक केलेल्या सराईत गुन्हेगाराचे नाव आहे. तर नागेश दगडू गुंड (वय 37) असे हत्या झालेल्या तरुणाचे नाव आहे.
पोलिसांनी दिलेल्या माहितीनुसार, 3 सप्टेंबर रोजी नागेश गुंड हा तुळजापूर येथून स्वारगेट येथील जेधे चौकात रात्री साडेअकरा वाजता उतरला. त्याचा मित्र कमलाकर घोडके हा त्याला घेऊन जाण्यासाठी येत असल्याने तो त्याची वाट पाहत उभा होता. यावेळी दुचाकीवरून आलेल्या एकाने त्याच्याजवळ येऊन पैसे आणि इतर ऐवज काढुन दे अशी मागणी केली. त्यास नागेश याने विरोध करून प्रतिकार केल्याने चोरट्याने त्याच्या पायावर वार केला आणि खिशातील रोख रक्कम आणि मोबाईल काढून घेत तेथून पळून गेला. जखमी नागेश ला रुग्णालयात दाखल केले होते मात्र, तत्पूर्वीच त्याचा मृत्यू झाला. या प्रकरणी स्वारगेट पोलीस ठाण्यात हत्या केल्याप्रकरणी गुन्हा दाखल करण्यात आला.
या प्रकरणाचा तपास सुरू असताना पोलिसांना हा गुन्हा ऋषिकेष कामठे याने केला असल्याची माहिती मिळाली होती. त्यानुसार गुन्हे शाखेच्या पोलिसांनी 28 सप्टेंबर रोजी पहाटे त्याला कोथरूड येथून ताब्यात घेतले. त्याच्याकडे केलेल्या चौकशीत त्याने स्वारगेट येथील खुनाचा गुन्हा केल्याचे कबुल केले.
ऋषिकेश कामठे हा रेकॉर्डवरील गुन्हेगार आहे. लॉकडाउन घोषीत झाल्यानंतर मे 2020 मध्ये कामठे हा येरवडा कारागृहातुन तात्पुरत्या जामीनावर बाहेर आला होता. त्यानंतर त्याने स्वारगेट चौकातील हत्या केली आणि 15 दिवसांपूर्वी येरवडा पोलीस ठाणे हद्दीत जबरी चोरीचा गुन्हा केल्याची देखील कबुली दिली. त्याच्यावर यापूर्वी खुनाचा प्रयत्न, घरफोडी, जबरी चोरी असे 16 गुन्हे दाखल आहेत.
