पालघर - तारापूरच्या तारापूर औद्योगिक वसाहतीतील कंपन्यांमधून निघणारे सांडपाणी आणि रासायनयुक्त पाणी राजरोसपणे परिसरातील शेती तसेच नैसर्गिक नाल्यांमध्ये सोडून नागरिकांच्या जीवाशी खेळ केला जात आहे. त्यामुळे परिसरातील पिण्याच्या पाण्याचे स्रोत दुषित झाले असून नागरिकांना अनेक आजार जडू लागले आहेत.
तारापूर औद्योगिक वसाहतीत साडेबाराशेहून अधिक कंपन्या असून, या कंपन्यांमधून निघणारे रसायनयुक्त सांडपाणी राजरोसपणे परिसरातील नागरिकांच्या शेतीत तसेच नैसर्गिक नाल्यांमधून परिसरात सोडले जात आहे. त्यामुळे बोईसरसह परिसरातील आठ ते दहा गावांमधील पाण्याचे स्रोत दूषित झाले आहेत. दूषित झालेल्या पाण्यामुळे नागरिकांना अनेक समस्यांना तोंड द्यावे लागते. सर्दी, ताप, डोकेदुखी, घसा दुखणे, अंगाला खाज, सांधे दुखी यासारख्या अनेक आजारांना ग्रामस्थांना तोंड द्यावे लागत आहे.
काही दिवसांपूर्वी कुंभवली नाका येथे असलेला बीपीटी प्लांट फुटल्याने या प्लांटमधील रसायनयुक्त पाणी परिसरात पसरले. हे पाणी गावातील पाण्याच्या स्त्रोतात गेल्याने विहिरी, कूपनलिका यांचे पाणी दूषित झाले आहे. त्यामुळे नागरिकांनी गावातील विहिरी आणि कूपनलिकेतून यांच्यातून येणाऱ्या पाण्याचा वापरही बंद केला आहे. त्यामुळे या भागातील चार ते पाच हजार नागरिकांसमोर पिण्याच्या पाण्याचा गंभीर प्रश्न निर्माण झाला असून नागरिकांना टँकरच्या पाण्याचा आधार घ्यावा लागत आहे.
महाराष्ट्र प्रदूषण नियंत्रण मंडळ आणि एमआयडीसी यांच्याकडे वारंवार तक्रारी अर्ज करून देखील दुर्लक्ष करत असल्याचा आरोप येथील स्थानिकांकडून करण्यात येत आहे.
हेही वाचा - उघड्या गटारात पडून ४ वर्षीय बालकाचा मृत्यू ; विरारच्या अर्नाळा बंदरपाडा येथील घटना
