नागपूर - काँग्रेस प्रदेशाध्यक्ष बाळासाहेब थोरात यांच्या नेतृत्वात आज नागपूरमध्ये ट्रॅक्टर रॅलीचे आयोजन करण्यात आले होते. मात्र, आचारसंहिता भंग होऊ नये, म्हणून काँग्रेसने रॅली रद्द केली आहे. हिवाळी अधिवेशनाच्या तोंडावर भाजपाला मुद्दा मिळू नये, यासाठी काँग्रेसने रॅली रद्द करण्याचा निर्णय घेतला असल्याचे बोलले जात आहे.
बाळासाहेब थोरातांनी दौरा केला रद्द -
पदवीधर मतदार संघासाठी काँग्रेसकडून अभिजित वंजारी यांचा उमेदवारी अर्ज दाखल होणार आहे. यावेळी ट्रॅक्टर रॅलीच्या माध्यमातून काँग्रेस नेते नागपुरात शक्तिप्रदर्शन करण्याच्या प्रयत्नात होते. गेल्या महिन्यात केंद्र सरकारने मंजूर केलेल्या शेती आणि शेतकऱ्यांच्या संदर्भातील तीन कायद्यांचा निषेध करणे हाही यामागचा एक हेतू होता. त्यासाठी जिल्ह्यातून तीनशे ट्रॅक्टर नागपूरात येणार होते. पोलिसांनी रॅलीला परवानगी देण्यासंदर्भात असमर्थता दर्शवली होती. त्यानंतर काँग्रेस नेत्यांनी परवानगी मिळवण्यासाठी धावपळही सुरू झाली होती. हा विषय प्रदेशाध्यक्ष बाळासाहेब थोरात यांच्यापर्यंत गेल्यानंतर त्यांनी आपला नागपूर दौरा रद्द केला. त्यामुळे अभिजित वंजारी यांचा उमेदवारी अर्ज दाखल करण्याचा मुहूर्त पुढे ढकलण्यात आला आहे. या संपूर्ण घटनाक्रमात प्रदेशाध्यक्ष बाळासाहेब थोरात यांची प्रकृती बिघडल्याने दौरा रद्द केल्याचे कारण देखील पुढे केले जात आहे.
ट्रॅक्टर रॅलीनंतर भाजपाकडून काँग्रेसला घेरण्याचा झाला असता प्रयत्न -
मुख्यमंत्री उद्धव ठाकरे आणि पर्यावरण मंत्री आदित्य ठाकरे यांच्यावर टीका करणाऱ्या समित ठक्करच्या अटकेला विरोध करण्यासाठी भाजपाच्या स्थानिक नेत्यांनी आणि कार्यकर्त्यांनी नागपुरात आंदोलन केले होते. त्यामुळे भाजपा कार्यकर्त्यांवर गुन्हेही दाखल झाले आहेत. काँग्रेसने ट्रॅक्टर रॅली केल्यानंतर काँग्रेस नेत्यांवर अशाच प्रकारचे गुन्हे दाखल करण्याची मागणी केली जाऊ शकते. याचा अंदाज आल्याने काँग्रेसच्या नेत्यांनी ट्रॅक्टर रॅली रद्द केली, अशी चर्चा नागपुरात रंगत आहे.
हेही वाचा - नागपूर पदवीधर मतदारसंघ; काँग्रेसचा उमेदवार ठरला, भाजपचा उमेदवार अद्याप अनिश्चित
