BMC On MLA Waikar Hotel Constriction : आमदार रवींद्र वायकर यांनी बांधकाम करण्यापूर्वी कळवले नसल्यामुळे स्थगिती; महापालिकेचा खुलासा

उद्धव बाळासाहेब ठाकरे गटाचे आमदार रवींद्र वायकर यांनी 'फाईव्ह स्टार क्लब' या हॉटेलच्या नवीन बांधकामाला मुंबई महानगरपालिकेने स्थगिती दिली. त्या स्थगितीला आव्हान देण्यासाठी वायकर यांनी मुंबई उच्च न्यायालयात आव्हान याचिका दाखल केली. त्यावर आज सुनावणीवेळी मुंबई महानगरपालिकेने प्रतिज्ञापत्र सादर केले आणि त्यात नमूद केले की, आम्हाला या बांधकामाबाबत वायकर यांनी कळविले नाही. तर वायकर यांचे वकील यांनी यावर सविस्तर चर्चा होण्याची मागणी केल्यामुळे याबाबत पुढील सुनावणी सोमवारी न्यायालयाने निश्चित केली आहे.

मुंबई : आमदार रवींद्र वायकर यांनी फाईव्ह स्टार क्लब हॉटेल वीस वर्षांपूर्वी बांधले. त्यामध्ये आता त्यांना नवीन सुधारणा करायच्या होत्या. परंतु, त्यांच्या या हॉटेल बांधकामाच्या संदर्भातील मिळालेली परवानगी बेकायदेशीर आहे. त्यामुळे मुंबई महानगरपालिकेने त्यांच्या हॉटेलमधील नवीन बांधकामाला स्थगिती दिली. भाजपचे माजी खासदार किरीट सोमैया यांनी तशी तक्रार केली होती आणि त्या तक्रारीच्यानंतर महापालिकेने स्थगिती आदेश वायकर यांना जारी केला होता. त्या स्थगितीच्या विरोधात रवींद्र वायकर यांनी मुंबई उच्च न्यायालयाच्या न्यायमूर्ती सुनील बिशुक्रे आणि न्यायमूर्ती राजेश पाटील यांच्या खंडपीठासमोर ही याचिका दाखल केली होती. मागच्या सुनावणीच्यावेळी न्यायालयाने मुंबई महानगरपालिकेला प्रतिज्ञापत्र सादर करण्याचे निर्देश दिले होते. महापालिकेने आज प्रतिज्ञापत्र सादर केले आणि त्यात मुद्दा अधोरेखित केला की, रवींद्र वायकर यांनी बांधकाम करताना महापालिकेला काही कळवलेले नाही.

वायकरांच्या वकिलाचा युक्तिवाद : रवींद्र वायकर यांचे वकील एस पी चिनॉय यांनी या प्रतिज्ञापत्रावर आक्षेप घेत मुद्दा मांडला की, ज्या बांधकामाला मुंबई महानगरपालिकेने परवानगी दिलेली होती. त्याबाबत नगर विकास विभागाकडे पत्र देखील पाठवलेले आहे. त्यात मुद्दा अधोरेखित केलेला आहे की, रवींद्र वायकर यांच्या फाईव्ह स्टार क्लब हॉटेल शिवाय इतर दोन बांधकाम अशा एकूण तीन बांधकामांना परवानगी दिल्याचा त्यात उल्लेख आहे. मग महानगरपालिकेला याबाबत कल्पना नव्हती, असे ते कसे काय म्हणू शकतात? वकील एस पी चिनॉय यांनी यावर अधिक साधक-बाधक चर्चा होण्याची मागणी देखील केली. खंडपीठासमोर न्यायालयीन काम प्रचंड असल्यामुळे त्यांनी याबाबत दोन्ही पक्षांना आपली भूमिका मांडण्याची पूर्ण संधी दिली जाईल. तसेच याबाबत दोन्ही पक्षकारांनी तपशीलवार कागदपत्रे देखील सादर करावी, असे म्हणत ही सुनावणी पुढील सोमवारी निश्चित केली.

'ही' आहे प्रकरणाची पार्श्वभूमी : भाजपाचे खासदार किरीट सोमैया यांनी आरोप करत तक्रार दाखल केली होती की, आमदार रवींद्र वायकर यांच्या हॉटेलचे बांधकाम बेकायदेशीर आहे. तक्रारीची दखल घेत मुंबई महानगरपालिकेने रवींद्र वायकर यांच्या हॉटेलमधील नव्याने होत असलेल्या बांधकामाची परवानगी नाकारत स्थगिती दिली होती. मागीलवर्षी ही तक्रार दाखल केली होती. मात्र, रवींद्र वायकर यांनी विकास नियंत्रण नियमावली, 1991 आणि त्याचा आराखडा आणि राज्य शासनाचे धोरण या नियमानुसारच बांधकाम होत असल्याचा दावा केलेला आहे.

काय म्हणाले रवींद्र वायकर : आमदार रवींद्र वायकर यांच्याशी प्रत्यक्ष संवाद साधला असता त्यांनी खुलासा केला की, 25 वर्षांपासून फाईव्ह स्टार क्लब हॉटेल बांधलेले आहे आणि त्या ठिकाणी नव्याने बांधकाम करत असतानाच बेकायदेशीररित्या त्याला स्थगिती दिली आहे. मुंबई महापालिकेने नगर विकास विभागाला कळवलेल्या पत्रामध्ये ह्या बांधकामाला परवानगी दिल्याचा उल्लेख आहे. त्यामुळे हे बांधकाम बेकायदेशीर नाही.

हेही वाचा:

1. Ravindra Waikar : रवींद्र वायकरांना दिलासा, स्टार क्लब हॉटेलला परवानगी नाकारल्याच्या आदेशाला न्यायालयाची स्थगिती