मुंबई - बंदी घालण्यात आलेल्या 'स्टूडंट इस्लामिक मुव्हमेंट ऑफ इंडिया'( सिमी) या दहशतवादी संघटनेचा सभासद असलेल्या एजाज अक्रम (वय-40) याला अटक करण्यात आली. महाराष्ट्र दहशतवादी विरोधी पथकाने (एटीएस) मध्यप्रदेश पोलिसांच्या सहाय्याने बुऱ्हाणपूर येथे ही कारवाई केली.
मध्य प्रदेशमधील सत्र न्यायालयातून एजाज अक्रम याची ट्रान्झिट रिमांड मिळाल्यानंतर त्याला महाराष्ट्रात आणले जाईल. महाराष्ट्रात 2006 मध्ये सापडलेल्या शस्त्रसाठा प्रकरणात इजाज अक्रम हा सुद्धा सहभागी होता. मागील अनेक वर्षांपासून महाराष्ट्र एटीएस त्याच्या शोधात होते. तो बुऱ्हाणपूर येथे असल्याची माहिती मिळताच मध्य प्रदेश पोलिसांच्या सहाय्याने महाराष्ट्र एटीएसने त्याला अटक केली. अक्रमकडून मोठ्या प्रमाणात शस्त्रसाठा सापडल्याचे एटीएसच्या अधिकाऱ्यांनी सांगितले.
काय आहे सिमी ?
'स्टूडंट इस्लामिक मुव्हमेंट ऑफ इंडिया'ची स्थापना 25 एप्रिल 1977मध्ये उत्तर प्रदेशमधील अलिगड येथे करण्यात आलेली होती. या संघटनेच्या दहशतवादी कारवाया समोर आल्यानंतर 2002 मध्ये केंद्र सरकारकडून या संघटनेवर बंदी घालण्यात आली होती. मात्र, 2008 मध्ये विशेष सत्र न्यायालयामध्ये दाखल याचिकेवर सुनावणीनंतर या संघटनेवरील बंदी उठवण्यात आली. ऑगस्ट 2008 मध्येच पुन्हा एकदा सर्वोच्च न्यायालयाकडून सीमीवर बंदी घालण्यात आली. अन लॉफुल अॅक्टिव्हिटी प्रिव्हेन्शन एक्ट 1967 नुसार सिमीवर बंदी आहे. एटीएसच्या माहितीनुसार सिमीचे दिल्ली, उत्तर प्रदेश, मध्यप्रदेश, गुजरात, केरळ, आंध्र प्रदेश आणि महाराष्ट्रात जाळे निर्माण झाले होते. मात्र केंद्र सरकारकडून बंदी घालण्यात आल्यानंतर इंडियन मुजाहिद्दीन या नावाने सध्या सीमी कार्यरत असल्याचा संशय आहे.