मुंबई Honor Killing in Mumbai : प्रेमविवाह केल्याच्या रागातून वडिलानं त्याच्या मुलाच्या मदतीनं तरुणीसह तिच्या प्रियकराला संपवल्यानं मोठी खळबळ उडाली आहे. ही ऑनर किलिंगची घटना मुंबईतील गोवंडी परिसरात उघडकीस आली. या घटनेतील प्रियकर हा उत्तरप्रदेशातील असल्याचंही पोलीस उपायुक्त हेमराज राजपूत यांनी यावेळी स्पष्ट केलं. करण रमेशचंद्र असं या घटनेतील मृत प्रियकराचं नाव आहे. तीन आरोपींना अटक तर तीन विधी संघर्ष बालकांना ताब्यात घेण्यात आल्याचं पोलीस उपायुक्त राजपूत यांनी सांगितलं आहे.
गोवंडीत आढळला होता अनोळखी मृतदेह : गोवंडी पोलीस ठाण्याच्या परिसरात एक अनोळखी मृतदेह आढळून आल्याची घटना 14 ऑक्टोबरला उघडकीस आली होती. या प्रकरणी गोवंडी पोलीस ठाण्यात भादंवी कलम 302, 201 नुसार गुन्हा दाखल करण्यात आला होता. याप्रकरणाचा तपास पोलीस उपायुक्त हेमराज राजपूत यांच्या मार्गदर्शनाखाली गोवंडी पोलीस ठाण्याचे वरिष्ठ पोलीस निरीक्षक सुदर्शन होनवडकर यांच्या पथकाकडून सुरू होता. या तपासात धक्कादायक घटना उघडकीस आली. मृत तरुण करण रमेशचंद्र हा उत्तरप्रदेशातील असल्याचं पोलीस तपासात उघड झालं. त्यामुळे पोलिसांनी या खुनाचे दागेदोरे शोधण्यास सुरुवात केली असता, मोठी खळबळजनक माहिती समोर आली. प्रेमविवाह केल्यानं हा खून करण्यात आल्याचं पोलीस तपासात उघड झाल्याचं पोलीस उपायुक्त हेमराज राजपूत यांनी यावेळी सांगितलं.
प्रेमविवाह केल्यानं ऑनर किलिंग : मृत करण रमेशचंद्र याच्या खुनाचा तपास केल्यानंतर पोलिसांनी मृताच्या सासऱ्याला संशयावरुन ताब्यात घेतलं. त्याला विश्वासात घेऊन विचारपूस केली असता, त्यानं मुलगा आणि त्याच्या मित्रांच्या मदतीनं मृत करण रमेशचंद्र याचा खून केल्याचं कबूल केलं. मुलीनं आंतरधर्मीय विवाह केल्यानं या करणचा खून करण्यात आल्याची कबुली मृताच्या सासऱ्यानं दिली. यासह करणच्या पत्नीचादेखील खून केल्याची कबुली सासऱ्यानं दिली. त्यामुळे वडिलानचं मुलीचा आणि जावयाचा खून केल्यानं पोलीसही चक्रावून गेले.
पोलिसांनी मुलीचाही मृतदेह घेतला ताब्यात : प्रेमविवाहाला विरोध असल्यानंतरही मुलीनं आंतरधर्मीय असलेल्या करण रमेशचंद्र याच्यासोबत प्रेमविवाह केला होता. त्याला मुलीचे वडील, भाऊ आणि त्यांच्या नातेवाईकांचा विरोध होता. त्यामुळेच वडील, भाऊ आणि त्याच्या मित्रांनी करण रमेशचंद्र आणि त्याच्या पत्नीचा खून केल्याची माहिती पोलीस उपायुक्त हेमराज राजपूत यांनी दिली. मुलीच्या वडिलानं मुलीचा खून करुन मृतदेह ठेवलेलं ठिकाण पोलिसांना दाखवलं. घटनास्थळावरुन पोलिसांनी मुलीचा मृतदेह ताब्यात घेतल्याची माहिती पोलीस उपायुक्त हेमराज राजपूत यांनी दिली.
तीन आरोपींच्या आवळल्या मुसक्या : मुंबईत ऑनर किलिंगच्या घटनेतून दोन खून करण्यात आल्यानं मोठी खळबळ उडाली आहे. याप्रकरणी पोलिसांनी मुलीचे मारेकरी वडील, भाऊ आणि त्याचा मित्राच्या मुसक्या आवळल्या आहेत. या प्रकरणात सहभागी असलेल्या तीन विधीसंघर्षग्रस्त बालकांना ताब्यात घेण्यात आल्याची माहितीही पोलीस उपायुक्त हेमराज राजपूत यांनी यावेळी दिली. या आरोपींना न्यायालयात हजर केलं आसता, त्यांना न्यायालयानं 27 ऑक्टोबरपर्यंत पोलीस कोठडी ठोठावल्याची माहितीही पोलीस उपायुक्त हेमराज राजपूत यांनी दिली आहे.
हेही वाचा :
