लातूर - लातूर शहर हा मतदारसंघ काँग्रेसच्या बालेकिल्ल्यातील गड आहे. मात्र, या जागेवरही सुरुंग लावण्याच्या दृष्टीने भाजपकडून खेळी केली जात आहे. आतापर्यंत काँग्रेसशी एकनिष्ठ राहिलेले शिवराज पाटील-चाकूरकर यांच्या सुन अर्चना पाटील यांच्या नावाची चर्चा सुरू झाल्याने सर्वांच्याच भुवया उंचावल्या आहेत. याबाबत मात्र, चित्र स्पष्ट नसले तरी यासंदर्भात भाजपसोबत बैठक झाल्याची माहिती समोर येत आहे. त्यामुळे भाजपकडून लातूर शहरच्या उमेदवाराबाबत उत्कंटता शिगेला पोहोचली आहे.
लातूर शहरातून आमदार अमित देशमुख हे निवडणुकीच्या आखाड्यात असताना भापजपकडून मात्र, वेगळीच खेळी केली जात आहे. आतापर्यंत अर्चना पाटील यांच्या नावाची चर्चा दबक्या आवाजात होती. मात्र, लातूर शहराच्याच उमेदवाराचे नाव घोषित न केल्याने या ठिकाणी अर्चना पाटील याच भाजपकडून निवडणुक लढवतील अशी स्थिती निर्माण झाली आहे. या अनुषंगाने चार दिवसांपूर्वी बैठकही झाल्याचे समजत आहे.
हेही वाचा - विलासरावांचे धाकटे चिरंजीवही निवडणुकीच्या रिंगणात, भाजपकडून रमेश कराडांचा पत्ता कट
प्रचारादरम्यान आमदार अमित देशमुख यांनी माझ्यासमोर विरोधकांकडे उमेदवारच नसल्याचे सांगितले होते. परंतु, भाजप हा वेगळ्याच खेळीत असून काँग्रेसशी एकनिष्ठ राहिलेले शिवराज पाटील-चाकूरकर यांच्या सुनेलाच उमेदवारी देऊन मोठा राजकीय भूकंप करण्याची शक्यता वर्तिवली जात आहे. या सर्व घडामोडीला माजी गृहमंत्री शिवराज पाटील-चाकूरकर यांचा विरोध आहे. त्यामुळे त्यांच्या विरोधाला डावलूनही उमेदवारी दिली जाणार का हे पाहणे महत्वाचे ठरणार आहे.
हेही वाचा - औसातून मुख्यमंत्र्यांचे पीए तर निलंग्यामध्ये पुन्हा काका-पुतण्यात लढाई
आतापर्यंत प्रत्येक निवडणुकीत आमदार अमित देशमुख यांच्या प्रचारार्थ उपस्थित राहणारे शिवराज पाटील-चाकूरकर सुनेसाठी आपली भूमिका बदलणार का याची चर्चाही रंगू लागली आहे.
