कोल्हापूर - तामिळनाडूच्या कुन्नूरमधील नीलगीरीच्या जंगलात भारतीय हवाई दलाच्या हेलिकॉप्टरला मोठा अपघात झाला. यामध्ये भारतीय संरक्षण दलांचे सीडीएस बिपीन रावत व त्यांच्या पत्नीसह 12 लष्करी अधिकाऱ्यांचे निधन झाले आहे. चीफ ऑफ डिफेन्स स्टाफ जनरल बिपीन रावत व श्रीमती मधुलिका रावत यांचे छत्रपती घराण्याचे अतिशय जिव्हाळ्याचे संबंध होते. छत्रपती शिवाजी महाराजांच्या चरित्राचा अभ्यास असलेले लष्करप्रमुख आज आपल्यातून निघून गेले, हे मनाला अजूनही पटत नाही असे म्हणत राज्यसभेचे खासदार संभाजीराजे छत्रपती यांनी रावत आणि हेलिकॉप्टर दुर्घटनेत मृत्युमुखी पडलेल्या सर्वांना फेसबुक पोस्टद्वारे श्रद्धांजली वाहिली आहे.
आज दुपारी बिपीन रावत त्यांची पत्नी आणि यांच्यासह 13 जणांचा तामिळनाडू येथे हेलिकॉप्टर दुर्घटनेत मृत्यू झाला. त्यानंतर संभाजीराजेंनी अनेक आठवणींना उजाळा दिला आहे.
दिल्ली येथील माझ्या निवासस्थानी ते आले असता ताराबाई महाराणीसहेबांचे तैलचित्र पाहून त्यांनी अत्यंत उत्सुकतेने त्यांच्याबद्दल माहिती घेतली होती व युद्धशास्त्रात त्यांचा इतिहास शिकवला जावा, यासाठी त्यांनी प्रयत्न करण्याची इच्छा बोलून दाखवली होती, असेही संभाजीराजे यांनी म्हटले आहे.
त्यांच्या अशा आकस्मिक व धक्कादायी जाण्याने एक मित्र व मार्गदर्शक गमावल्याची खंत मनाला लागून राहिली आहे. शिवाय संपूर्ण राष्ट्राचे कधीही न भरून निघणारे नुकसान झाले असून जनरल रावत, श्रीमती मधुलिका रावत व त्यांच्यासोबतच्या अन्य मृतात्म्यास भावपूर्ण श्रध्दांजली असेही त्यांनी आपल्या पोस्ट मधून म्हटले आहे.