बुलडाणा Ravikant Tupkar Arrested : शेतकरी नेते रविकांत तुपकर यांना बुलडाणा पोलिसांनी अटक केली आहे. रविकांत तुपकर यांनी कापूस, सोयाबीनच्या भावाबाबत 29 तारखेला मंत्रालयात घेराव घालण्याचा इशारा दिला होता. त्यामुळं रविकांत तुपकर यांना बुलडाणा पोलिसांनी सीआरपीसी 149 अंतर्गत नोटीस बजावली होती. मात्र रविकांत तुपकर यांनी आक्रमक पवित्रा घेत 29 नोव्हेंबर रोजी मंत्रालयाला घेराव घालण्याचा इशारा दिला होता. त्यामुळं शेतकरी नेते रविकांत तुपकर यांना आज बुलडाणा पोलिसांनी अटक केली आहे. रविकांत तुपकर यांच्या अटकेनंतर बुलडाण्यात कार्यकर्ते आक्रमक झाले आहेत.
पिकाला हमीभाव देण्याची मागणी : राज्यात विदर्भ, मराठवाड्यातील शेतकऱ्यांच्या पिकाला वाढीव दर मिळाण्यासाठी रविकांत तुपकर यांनी सरकारला निर्वाणीचा इशारा दिला होता. कापूस, सोयाबीनसह इतर पिकाला त्यांनी हमीभाव देण्याची मागणी राज्यसरकारकडं केली होती. या मागणीसाठी तुपकर 29 नोव्हेंबरला मुंबईत मंत्रालयाला घेराव घालणार होते. कापूस उत्पादक शेतकरी, शेतमजुरांच्या विविध मागण्यांसाठी तुपकर यांनी बुलडाण्यात 20 नोव्हेंबरला शेतकरी एल्गार मोर्चा काढला होता. या मोर्चात हजारो शेतकऱ्यांच्या उपस्थितीत तुपकर यांनी कापूस, सोयाबीन पिकांना हमी भाव देण्याची मागणी करत सरकारला अल्टिमेटम दिला होता. मात्र, त्या आगोदरच रविकांत तुपकर यांना पोलिसांनी ताब्यात घेतलं आहे.
पोलिसांच्या कारवाईचा निषेध : त्यानुसार बुलडाणा शहर पोलिसांनी तुपकर यांना आंदोलन न करण्याची नोटीस बजावली होती. मात्र, त्यांनी पोलिसांची नोटीस स्वीकारणार नसल्याचं म्हटलं होतं. 29 नोव्हेंबरला मंत्रालयात आंदोलन करण्याचा निर्धार असल्याचं तुपकर यांनी माध्यमांना सांगितलं होतं. कायदा, सुव्यवस्थेचा प्रश्न निर्माण होण्याची शक्यता लक्षात घेऊन पोलिसांनी शनिवारी दुपारी रविकांत तुपकर यांना अटक केलीय. त्यानंतर त्यांना शहर पोलीस ठाण्यात आणण्यात आलं. तुपकर यांना पोलिसांनी अटक केल्याचं वृत्त समजताच शेतकरी कार्यकर्त्यांनी पोलिसांच्या कारवाईचा निषेध करत रास्ता रोको करून टायर जाळल्याची घटना घडली आहे.
हेही वाचा -
