Doctor Looted Case : रुग्ण तपासणीसाठी डॉक्टरला घरी बोलावलं अन् मारहाण करत लुटलं; पाच आरोपी अटकेत

Doctor Looted Case : बुलडाणा शहरातील एका डॉक्टरला जाळ्यात ओढत त्याच्याकडून साडेआठ लाख रुपयांची खंडणी उकळण्याची माहिती समोर आली आहे. आठ दिवसांपूर्वी घडलेल्या या प्रकरणात गुरुवारी रात्री उशिरापर्यंत गुन्हा दाखल करण्याची प्रक्रिया शहर पोलीस ठाण्यात सुरू होती. शुक्रवारी (20 ऑक्टोबर) सात पैकी पाच आरोपींना पोलिसांनी अटक केली.

बुलडाणा : Doctor Looted Case : डॉक्टरच्या एका ओळखीच्या व्यक्तीचाही यात समावेश असल्याची माहिती समोर आली आहे. पोलिसांनी अद्याप या प्रकरणात सावध पावले उचलत सात पैकी पाच जणांना अटक केली आहे. या प्रकरणात स्वतः ठाणेदार प्रल्हाद काटकर यांनी सूत्र हाती घेत याचा छडा लावला आहे.

डॉक्टरला मारहाण आणि चित्रफीतही काढली : बुलडाण्यातील एका डॉक्टरला फोनवरून रुग्णाला पाहण्यासाठी बोलवण्याचा बहाणा करण्यात आला. डॉक्टर घटनास्थळी तपासणी करण्यासाठी पोहोचल्यावर त्यांना मारहाण करण्यात आली व चित्रफितसुद्धा काढण्यात आली. त्यानंतर बदनामीचा धाक दाखवत त्यांच्याकडून खंडणी वसूल करण्यात आली. पोलिसांनी आरोपींचे लोकेशन ट्रेस करत पाच जणांना संभाजीनगर येथून अटक केली आहे. त्यांच्यावर खंडणीचे गुन्हे दाखल केले आहेत.

मोबाईल लोकेशनच्या आधारे 'या' आरोपींना केली अटक : या गुन्ह्यात अजय नंदकुमार नागपुरे (वय 30 वर्षे, रा. बुलडाणा) यास त्याचे राहते घरातून ताब्यात घेतले; परंतु तोपर्यंत बातमी प्रसारीत झाल्याने दीक्षांत ब्रम्हचारी नवघरे (वय 23 वर्ष, रा. जुनागांव वा. नं. 10 बुलडाणा), विशाल मनोहर गायकवाड (वय 24 वर्षे, रा. पोलीसमित्र वसाहत, चिखली रोड, बुलडाणा), आदेश सुनिल राठोड (वय 19 वर्षे, रा. क्रीडा संकुल रोड, बुलडाणा), सुरज मोतीराम पसरटे (वय 20 वर्षे, रा. तारकॉलनी, बुलडाणा) यांच्या अटकेची बुलडाणा पोलिसांनी रात्रीच मोहिम हाती घेतली. या आरोपींना त्यांच्या मोबाईल लोकेशनच्या आधारे ट्रेस करून मोठ्या शिताफीने छत्रपती संभाजीनगर जिल्ह्यातील निपानी आडगांव शिवारातून अटक करण्यात आली आहे.

एका डॉक्टरला कॅन्सरचा रुग्ण तपासायचा आहे असे सांगून नियोजित स्थळी बोलावण्यात आले. येथे आरोपींनी एका बंद रुममध्ये डॉक्टरला मारहाण केली. तसेच कोयत्याचा धाक दाखवून त्याच्याकडील 10 हजार रुपये काढून घेतले. यानंतर मैदानावर नेऊन डॉक्टरला मारहाण करण्यात आली आणि त्याला साडेआठ लाखांची खंडणी मागितली गेली. फिर्यादीने पोलिसात तक्रार दिल्यानंतर सात पैकी पाच आरोपींना त्यांचे मोबाईल लोकेशन ट्रेस करून औरंगाबाद जवळील भागातून ताब्यात घेतले - बी. बी महामुनी अप्पर पोलीस अधीक्षक, बुलडाणा

आरोपींवर 'या' कलमांन्वये अटक : आरोपींवर कलम 395, 384, 385, 364 अ, 342, 323, 506, 120 भादंवी, सह कलम 4, 25 आर्म ॲक्ट, 65 महिती तंत्रज्ञान अधिनियम 2000 प्रमाणे शहर पोलीस ठाण्यात गुन्हे दाखल करण्यात आले आहेत. 5/2023 दि. 20/10/2023 चे 04/54 वा या गुन्ह्यात अटक करण्यात आली आहे. आरोपीचा पोलीस कस्टडी रिमांड घेऊन पुढील तपास पोलीस अधीक्षक सुनिल कडासने, अपर पोलीस अधीक्षक महामुनी, उपविभागीस पोलीस अधिकारी वाघ यांचे मार्गदर्शनात ठाणेदार प्रल्हाद काटकर (बुलडाणा शहर) हे करीत आहेत.

हेही वाचा: