अमरावती - खासदार नवनीत राणा आणि त्यांचे पती आमदार रवी राणा हे दोघेही एकाच दुचाकीवर स्वार होऊन सुसाट वेगाने जात असल्याचा व्हिडिओ समोर आला आहे. यापूर्वीही हे दाम्पत्य अनेकदा दुचाकीवर शहरात फेरफटका मारताना दिसले होते. मात्र, आता जिल्ह्याच्या खासदार आणि बडनेराचे आमदार यांची दुचाकीवारी चांगलीच चर्चेत आली आहे.
अमरावती लोकसभा मतदार संघाचे चित्र २३ मे रोजी रात्री १० वाजण्याच्या सुमारास स्पष्ट झाले. त्यानंतर अमरावती बडनेरा मार्गावरील नेमाणी गोडाऊन या मतमोजणी केंद्रावर विजयाचे प्रमाणपत्र स्वीकारण्यासाठी हे दाम्पत्य दुचाकीवर स्वार होऊन त्यांच्या शंकर नगर येथील निवास्थानावरुन निघाले. यावेळी त्यांच्यासोबत कार्यकर्तेही दुचाकी घेऊन होते.
आमदार रवी राणा आणि खासदार नवनीत राणा सातूर्णा चौक येथून दुचाकीवर जात असताना एका कार्यकर्त्याने मोबाईल कॅमेऱ्यात व्हिडिओ तयार केला. आता या व्हिडिओसोबत गाणे जोडून हा व्हिडिओ व्हायरल केला जात आहे. सोशल मीडियावर या व्हिडिओची धूम सुरू असताना आमदार दुचाकीवर आपल्या नवनियुक्त खासदार पत्नीला घेऊन निघाले असताना घाईत हेल्मेट घालायचे विसरले की काय, असा प्रश्न उपस्थित केला जात आहे.