संगमनेर: संगमनेर तालुक्याच्या पठारी भागातील अनेक शेतकर्‍यांनी यावर्षी मोठ्या प्रमाणात झेंडू फुलाची लागवड केली होती. मात्र यावर्षी झालेल्या अतिवृष्टीमुळे (heavy rain in maharashtra) झेंडूच्या फुलांना (zendu flower) सध्या कवडीमोल भाव मिळतो आहे. त्यामुळे आता जिल्ह्यातील फूल उत्पादक शेतकरी संकटात सापडले आहेत. (flower farmers in trouble).
परतीच्या पावसाचाही फटका: संगमनेर तालुक्यातील खंदरमाळ गावांतर्गत असलेल्या करंजेकर मळा येथे बाळासाहेब करंजेकर यांनी आपल्या दीड एकर क्षेत्रात झेंडूची लागवड केली आहे. त्यासाठी त्यांनी साधारण एक लाख रुपयांच्यावर खर्च केला. दसर्‍याच्या दोन तीन दिवस आधी फुले येणे चालू झाली. सुरुवातीला एका तोड्याला पन्नास रुपये किलोचा भाव मिळत होता, मात्र त्यानंतर तो भाव दहा ते पाच रुपयां पर्यंत घसरला. यावर्षी झालेल्या परतीच्या पावसामुळे फुलांमध्ये पाणी साचून फुले काळी पडत आहे. परिणामी आता फुलांवर झालेला लाखोंचा खर्च वसूल होती की नाही, असा प्रश्न शेतकरी करंजेकर यांना सतावू लागला आहे.
दसरा व दिवाळीच्या काळात झेंडूच्या फुलांना मोठी मागणी असते. मात्र ऐन सणासुदीत शेतकर्‍यांना आता नुकसानीचा सामना करावा लागण्याची दुर्दैवी वेळ आली आहे. अतिवृष्टीमुळे पिकांमध्ये पाणी साचल्याने पिके सडू लागली आहेत. त्यामुळे अनेक शेतकर्‍यांनी झेंडूची झाडे उपटून टाकली आहेत.
