टोकियो - भारताचा भालाफेकपटू नीरज चोप्राने ऐतिहासिक कामगिरी करताना अ‍ॅथलेटिक्समधील भारताचा पदकाचा दुष्काळ संपवला. भालाफेकच्या अंतिम फेरीत त्याने सुवर्ण पदक जिंकलं. त्याने पहिल्या व दुसऱ्या प्रयत्नातच एवढ्या लांब भाला फेकला की प्रतिस्पर्धींनी सुवर्णपदकाची अपेक्षाच सोडली. दरम्यान, अॅथलेटिक्स प्रकारात भारतीय खेळाडूने जिंकलेले हे पहिलं पदक आहे. याआधी अशी कामगिरी कोणत्याही भारतीय अॅथलीटला करता आलेली नाही. तसेच २००८ ऑलिम्पिकमध्ये अभिनव बिंद्रा याने नेमबाजीत सुवर्ण पदक जिंकलं होते. यानंतर ऑलिम्पिक स्पर्धेत भारतासाठी वैयक्तिक गटात सुवर्णपदक जिंकणारा नीरज हा पहिला भारतीय ठरला.
नीरज चोप्रा याने पहिल्याच प्रयत्नात 87.03 मीटर लांब भाला फेकला. क्रमवारीनुसार त्याला दुसऱ्या क्रमांकावरून स्पर्धेत सुरुवात करावी लागली. चेक रिपब्लिक ऑफ मोल्डोव्हाच्या अ‍ॅड्रीयन मार्डारे हा प्रथम भालाफेकीसाठी आला आणि त्याने 81.16 मीटर लांब भाला फेकला. अंतिम फेरीत नीरजसह 12 खेळाडू होते. परंतु यातील एकाही खेळाडूला नीरजपेक्षा लांब भाला फेकता आला नाही.
दुसऱ्या प्रयत्नात नीरजने आपलाच विक्रम मोडला. त्याने 87.58 मीटर लांब भाला फेकला. त्यानंतर त्याचा हा विक्रम इतर खेळाडूंना राहिलेल्या प्रयत्नात मोडता आला नाही. चेक रिपब्लिकच्या जाकुब याने 86.67 मीटर लांब भाला फेकला. परंतु तो नीरजच्या पुढे जाऊ शकला नाही. त्याला दुसऱ्या क्रमाकांवर समाधान मानावे लागले.
पुरूष भालाफेकमध्ये नीरज चोप्राने सुवर्ण पदक जिंकले. तर चेक रिपब्लिकचा जाकुब रोप्य पदकाचा मानकरी ठरला. तर चेक रिपब्लिकचा दुसरा खेळाडू वेसलीला कास्य पदक मिळालं. पाकिस्तानचा अर्शद नदीम 5व्या स्थानावर राहिला.
पात्रता फेरीत नीरजने फेकला 86 मीटर लांब भाला
नीरज सद्या तुफान फार्मात आहे. त्याने टोकियो ऑलिम्पिकमधील पात्रता फेरीत 86.65 मीटर लांब भाला फेकला. तो पात्रता फेरीत ग्रुप ए आणि ग्रुप बी मिळून पहिल्या स्थानावर होता. नीरजचे सर्वोत्कृष्ट प्रदर्शन 88.06 इतके आहे. त्याने हा थ्रो आशियाई क्रीडा स्पर्धेत केला होता. त्यावेळी तो सुवर्ण विजेता ठरला.
जर्मन प्रशिक्षकाकडून घेतली ट्रेनिंग -
नीरज चोप्रा हा भालाफेकचा सराव जर्मन प्रशिक्षकाच्या मार्गदर्शनात करत आहेत. जर्मनचे क्लाउस बार्तोनित्स हे त्याचे प्रशिक्षक आहेत. क्लाउस यांच्या मार्गदर्शनात नीरज चोप्राच्या कामगिरीत दिवसागणित सुधारणा होत असल्याचे पाहायला मिळत आहे.
5 सुवर्ण पदकाचा मानकरी नीरज चोप्रा
इंडियन आर्मीत काम करणारा नीरज चोप्रा याने आतापर्यंत 5 मोठ्या स्पर्धेत सुवर्ण पदक जिंकलं आहे. त्याने आशियाई क्रीडा स्पर्धा, राष्ट्रकुल, आशियाई चॅम्पियनशीप, साउथ आशियाई क्रीडा स्पर्धा, वर्ल्ड ज्यूनियर चॅम्पियनशीपमध्ये सुवर्ण पदक जिंकलं आहे.
वजन कमी करण्यासाठी आला आणि भालाफेकपटू बनला
नीरज चोप्रा हरियाणाचा पानीपत जिल्ह्याचा रहिवाशी आहे. त्याला आपलं वजन कमी करायचे होते. यामुळे तो अॅथलिटिक्समध्ये आला. त्यानंतर त्याने ग्रुप एज स्पर्धांमध्ये चांगली कामगिरी केली. यात त्याने अनेक स्पर्धा जिंकल्या. यानंतर नीरजने भालाफेकमध्ये करियर केलं. 2016 मध्ये त्याने इंडियन आर्मी जॉईन केली.
हेही वाचा - राष्ट्रपती, पंतप्रधानांसह देशभरातून नीरज चोप्रावर अभिनंदनाचा वर्षाव
हेही वाचा - Tokyo Olympics : व्वा रे पठ्ठ्या! बजरंग पुनियाने प्रतिस्पर्ध्याला आस्मान दाखवत जिंकलं कास्य पदक
