नवी दिल्ली : महिला T20 विश्वचषक चॅम्पियन बनण्यासाठी 10 संघ आता स्पर्धा करणार आहेत. 8 व्या विश्वचषक स्पर्धेची सुरुवात 10 फेब्रुवारीपासून सुरू होणार आहे. पहिला सामना दक्षिण आफ्रिका आणि वेस्ट इंडिज यांच्यात होणार आहे. 17 दिवस चालणाऱ्या विश्वचषकाचा अंतिम सामना 26 फेब्रुवारीला होणार आहे. दक्षिण आफ्रिका आयसीसी महिला टी-२० विश्वचषकाचे यजमानपद भूषवत आहे. विश्वचषकात सहभागी होणाऱ्या सर्व संघांची दोन गटांत विभागणी करण्यात आली आहे. यजमान दक्षिण आफ्रिका, न्यूझीलंड, बांगलादेश आणि श्रीलंका यांच्यासोबत ऑस्ट्रेलिया 'अ' गटात आहे. तर 'ब' गटात भारत, पाकिस्तान, इंग्लंड, आयर्लंड आणि वेस्ट इंडिज यांचा समावेश आहे.
ऑस्ट्रेलिया बनला सर्वाधिक वेळा चॅम्पियन : महिला T20 विश्वचषक स्पर्धेच्या 15 वर्षांच्या इतिहासात केवळ तीन देशांना चॅम्पियनचे विजेतेपद मिळवता आले आहे. ऑस्ट्रेलिया हा T20 विश्वचषकातील आतापर्यंतचा सर्वात यशस्वी संघ आहे. ऑस्ट्रेलिया सर्वाधिक पाच वेळा (2010, 2012, 2014, 2018, 2020) T20 चा चॅम्पियन बनला आहे. त्याचबरोबर इंग्लंड (2009) आणि वेस्ट इंडिज (2016) 1-1 वेळा चॅम्पियन बनले आहेत. त्याचबरोबर भारतीय संघ 15 वर्षांपासून विश्वचषकाच्या अंतिम फेरीत स्थान मिळवू शकलेला नाही. भारतीय संघ यावेळी इतिहास रचू शकतो.
पहिला विश्वकप इंग्लंडने जिंकला : जगातील 50 हून अधिक देशांतील महिला क्रिकेट संघ ही स्पर्धा खेळण्यासाठी इच्छुक आहेत. परंतु, केवळ 10 देश विश्वचषकासाठी पात्र ठरले आहेत. विश्वचषक स्पर्धेत भाग घेणारे संघ आयसीसीच्या पहिल्या दहा क्रमवारीत आहेत. ऑस्ट्रेलिया हा जगातील नंबर 1 संघ आहे. त्याचबरोबर जागतिक क्रमवारीत भारत चौथ्या स्थानावर आहे. 2009, 2010, 2012, 2014, 2016, 2018 आणि 2020 मध्ये महिला टी-20 विश्वचषकाच्या सात आवृत्त्या झाल्या आहेत. महिला टी-20 विश्वचषकाची पहिली आवृत्ती 2009 मध्ये इंग्लंडमध्ये झाली होती. न्यूझीलंडचा सहा गडी राखून पराभव करून इंग्लंड चॅम्पियन बनला. २०१२ पर्यंत आठ संघ या स्पर्धेत खेळत होते, ज्यांची संख्या २०१४ मध्ये १० झाली.
भारताला विश्वविजेता बनण्याची आशा : आताच झालेल्या ICC महिला अंडर-19 T20 विश्वचषक स्पर्धेच्या अंतिम सामन्यात भारताने इंग्लंडचा 7 गडी राखून पराभव करीत विश्वविजेतेपदावर मोहर उमटवली होती. विश्वचषकाचा अंतिम सामना भारत विरुद्ध इंग्लंड यांच्यात दक्षिण आफ्रिकेत खेळला गेला. भारताने नाणेफेक जिंकून प्रथम गोलंदाजी करण्याचा निर्णय घेतला. फलंदाजीला उतरताना इंग्लंडचा संघ ६८ धावांत आटोपला. पहिल्या टी 20 विश्वचषकावर भारतीय महिला संघाने आपले नाव कोरून मोठा इतिहास रचला होता.
