मुंबई - आयपीएल स्पर्धेसाठी तयार करण्यात आलेल्या बायो-बबलमध्ये असताना खेळाडूंना बऱ्याच नियमांचे आणि निर्बंधांचे पालन करावे लागते. परंतु, भारताच्या काही वरिष्ठ खेळाडूंना सूचना केलेले फारसे आवडत नसल्याचे, मुंबई इंडियन्स संघाचे क्षेत्ररक्षक प्रशिक्षक जेम्स पेमेंट यांनी सांगितलं.
काय म्हणाले जेम्स पेमेंट -
बायो बबलविषयी सांगताना जेम्स पेमेंट म्हणाले की, 'भारताच्या काही वरिष्ठ खेळाडूंना त्यांच्यावर निर्बंध लादलेले आणि सतत सूचना केलेले फारसे आवडत नाही. परंतु, आम्हाला भारतामध्ये पूर्णपणे सुरक्षित वाटत होते. बायो-बबलमध्ये कोरोनाचा शिरकाव होईल किंवा आमच्या जीवाला धोका असेल, असे आम्हाला कधीही वाटले नाही. मात्र, प्रवास करताना आम्हाला बऱ्याच आव्हानांचा सामना करावा लागू शकतो, याचा अंदाज आम्हाला होता.'
बायो-बबलमध्ये काही खेळाडूंना कोरोनाची बाधा झाल्याचे समजताच आमची चिंता वाढली. चेन्नईच्या काही सदस्यांना कोरोनाची बाधा झाल्याचे कळाले. आम्ही त्यांच्याविरुद्ध त्याआधीच सामना खेळला होता. त्यामुळे आमचे खेळाडू थोडे घाबरले होते, अशी कबुली देखील जेम्स यांनी दिली.
मी जास्त वेळ न्यूझीलंड आणि ऑस्ट्रेलियन खेळाडूंसोबत घालवत होते. कारण, बायो-बबलमध्ये असताना देखील खेळाडूंना कोरोना झाल्याचे कळल्यावर त्यांच्या मानसिकतेत बदल झाला होता, असेही जेम्स यांनी सांगितलं.
दरम्यान, अनेक खेळाडूंनी वैयक्तिक कारण देत आयपीएलमधून माघार घेतली. यात ऑस्ट्रेलियाचा खेळाडू अॅडम झम्पाचा देखील समावेश होता. ऑस्ट्रेलियामध्ये पोहोचताच झम्पाने आयपीएल स्पर्धेसाठी भारतामध्ये तयार करण्यात आलेला बायो-बबल असुरक्षित होता, असे सांगितले होते. त्यानंतर खेळाडूंना कोरोना लागण झाल्याचे समोर येताच बीसीसीआयने आयपीएल स्पर्धा तात्काळ स्थगित करण्याचा निर्णय घेतला.
हेही वाचा - स्मृती मानधाना, बुमराहसह 'या' खेळाडूंनी टोचून घेतली लस
हेही वाचा - कोरोना पॉझिटिव्ह सापडलात तर.., BCCIने खेळाडूंसाठीचे नियम केले कडक
