न्यूयॉर्क Israel Hamas Conflict : इस्राईल आणि पॅलेस्टाईनमध्ये सुरू असलेल्या युद्धाबाबत आता संयुक्त राष्ट्र महासभेनं ( युनायटेड नेशन्स जनरल असेंब्ली ) ठराव केला आहे. मानवतावादाची जबाबदारी आणि नागरिकांचं संरक्षण करण्यासाठी गाझामध्ये सुरू असलेलं युद्ध थांबवण्यात यावं, असा ठराव संयुक्त राष्ट्र महासभेनं केला आहे. भारतानं युद्धबंदी करण्यात यावी, या बाजुनं मतदान केलं आहे. युद्धबंदीच्या बाजुनं तब्बल 153 राष्ट्रांनी मतदान केलं. तर इस्रायल, अमेरिका आदी 10 देशांनी युद्धबंदीच्या विरोधात मतदान केलं आहे. युक्रेन, अर्जेंटीना, जर्मनी आदी 23 देश तटस्थ राहिले आहेत.
इस्रायल आणि पॅलेस्टाईनमध्ये युद्ध : हमासच्या दहशतवाद्यांनी 7 ऑक्टोबरला इस्रायलमध्ये हल्ला केल्यानंतर लाखो नागरिकांचा बळी गेला होता. त्यामुळे गाझामध्ये हमास आणि इस्रायलमध्ये युद्ध सुरू झालं होतं. या युद्धात दोन्ही देशाच्या नागरिकांचे बळी गेले आहेत. मात्र युद्धबंदी होत नसल्यानं या दोन्ही देशातील संघर्ष आणखी वाढत आहे. अमेरिकेच्या मध्यस्थीनं या दोन देशात तात्पुरती युद्धबंदी झाली होती. मात्र त्यानंतर पुन्हा युद्धाला सुरुवात झाली आहे.
यूएनमध्ये युद्धबंदीचा ठराव : पॅलेस्टाईन आणि इस्रायलमध्ये सुरू असलेल्या युद्धाबाबत संयुक्त राष्ट्र महासभेनं ( UNGA ) युद्धबंदीचा ठराव केला आहे. या ठरावाच्या बाजुनं भारतानं मतदान केलं आहे. भारताच्या यूएनमधील स्थायी प्रतिनिधी रुचिरा कंबोज यांनी भारताच्या वतीनं ठरावाच्या बाजुनं मतदान केलं. यावेळी त्यांनी "इस्रायलमध्ये 7 ऑक्टोबरला दहशतवादी हल्ला झाला. तिथं मोठ्या प्रमाणात जीवितहानी झाली आहे. तिथल्या नागरिकांना ओलिस ठेवल्याची चिंता आहे. त्यामुळे हे मानवतावादी संकट असून त्यामुळं मोठी मानवी हानी होत आहे. महिला आणि लहान बालकांचं नुकसान होत आहे. त्यामुळं आंतरराष्ट्रीय मानवतावादी कायद्याचं पालन करण्याची गरज आहे. पॅलेस्टाईन प्रश्नावर शांततापूर्ण मार्गानं कायमचा तोडगा काढणं गरजेचं आहे", असं रुचिरा कंबोज यांनी यावेळी स्पष्ट केलं.
युद्धबंदीच्या बाजुनं 153 देश मात्र अमेरिका विरोधात : यूएनमध्ये पॅलेस्टाईन आणि इस्रायल या दोन देशात सुरू असलेल्या युद्धबंदीचा ठराव करण्यात आला. या ठरावाच्या बाजुनं तब्बल 153 देश असल्याचं स्पष्ट झालं. मात्र इस्रायल आणि अमेरिकेसह 10 देशांनी युद्धबंदीविरोधात मतदान केलं आहे. 23 देशांनी मतदान केलं नसून ते तटस्थ राहिले आहेत.
इस्रायलचा नाश हाच हमासचा एकमेव हेतू : संयुक्त राष्ट्र महासभेनं पॅलेस्टाईन आणि इस्रायलमधील युद्धबंदीचा ठराव केला आहे. मात्र मसुद्याच्या ठरावात सुधारणा मंजूर करण्यात आली नाही. यावेळी इस्रायलचे संयुक्त राष्ट्र महासभेतील स्थायी प्रतिनिधी गिलाड एर्डन यांनी या युद्धबंदी ठरावात हमासचा उल्लेख नसल्यानं नाराजी व्यक्त केली. हा केवळ मानवतेविरोधात निषेध करुन संपणारा मुद्दा नाही. यामुळे गाझामधील विनाश लांबणीवर पडेल, त्यामुळे युद्धबंदीचा नेमका अर्थ काय, असा सवाल गिलाड एर्डन यांनी उपस्थित केला. इस्रायलचा नाश करणं हाच हमासचा एकमेव हेतू आहे. त्यामुळे इस्रायल संपेपर्यंत हमास पुन्हा पुन्हा हल्ले करत राहील. त्यामुळे हमासला त्यांच्या दहशतवादी कारवाया चालू ठेवण्यासाठी सगळे मदत का करू इच्छितात, असंही गिलाड एर्डन यांनी यावेळी स्पष्ट केलं. गाझामध्ये मानवतावादी मदत करण्यासाठी इस्रायल अगोदरच सगळी उपाययोजना करत असल्याचंही गिलाड एर्डन यांनी यावेळी सांगितलं.
हेही वाचा :
