लातूर - येणार...येणार म्हणून सभेच्या निर्धारित वेळेच्या केवळ १० मिनिट अगोदर राज्यस्थानचे उपमुख्यमंत्री सचिन पायलट यांचे लातूर येथील सभास्थळी आगमन झाले. मात्र, दरम्यान व्यासपीठावर भाषण करत असलेल्या माजी गृहमंत्री शिवराज पाटील चाकूरकर यांची चांगलीच गोची झाली.
लातूर येथे मंगळवारी रात्री काँग्रेसची सभा पार पडली. या सभेसाठी राज्यस्थानचे उपमुख्यमंत्री सचिन पायलट उपस्थित राहणार होते. मात्र, नांदेडहून येण्यास त्यांना उशीर झाला होता. दरम्यान, व्यासपीठावरील मान्यवरांनी मनोगत व्यक्त केले. शेवटच्या टप्प्यात माजी गृहमंत्री शिवराज पाटील चाकूरकर हे मनोगत व्यक्त करण्यास उभे राहिले. स्वातंत्र्यानंतरचा इतिहास सांगत त्यांनी या प्रगतीमध्ये काँग्रेसची भूमिका किती महत्वाची राहिली आहे, हे पटवून दिले. ४५ मिनिट झाल्यानंतरही सचिन पायलट वेळेवर पोहचले नाही म्हणून शिवराज पाटील चाकूरकर यांनी भाषण सुरुच ठेवले.
एवढ्यात उपस्थित महिलांमधील एकीने चंद्रावर बोलून बस्स झाले, आता लातूरच्या विकासाबाबत बोला असे सांगितले. त्यामुळे एकच हशा पिकला. याप्रकारानंतर मनोगत व्यक्त करण्यासाठी इतरांना बोलविण्यात आले. सभा संपण्यास केवळ १० मिनिटांचा अवधी बाकी असताना सचिन पायलट यांचे आगमन झाले. पायलट यांनी कमी वेळात भाषण करताना सरकारवर टीका करत मोदींना हटवण्याचे आवाहन केले. सभेला आमदार अमित देशमुख, मच्छिद्र कामंत, मोईन शेख यांच्यासह अनेकजणांची उपस्थिती होती.
