उत्तराखंड - येथील टिहरी गढवाल जिल्ह्यातील ऋषिकेश-गंगोत्री मार्गावर भीषण अपघात झाला आहे. पंजाबमधील यात्रेकरू हेमकुंड साहिबच्या हिमालयीन देवस्थानकडे जात असताना त्यांच्या गाडीवर दरड कोसळल्याने हा अपघात झाला. यात सहा जण ठार तर चार जण जखमी झाले आहेत. या अपघातानंतर या मार्गावरील वाहतूक काही काळ बंद करण्यात आली होती.
हेही वाचा- जम्मू-काश्मीरमध्ये ओलीस नागरिकाला सोडवण्यात यश, एका जवानाला वीरमरण
जसपाल सिंग, सुरेंद्र सिंग, गुरदीप सिंग, गुरप्रीत सिंग, जितेंद्र पाल आणि लवली असे या अपघातात ठार झालेल्यांची नावे आहेत. जखमींना तात्काळ जवळच्या रुग्णालयात उपचारासाठी दाखल करण्यात आले आहे. या घटनेची माहिती मिळताच एसडीआरएफचे एक पथक घटनास्थळी दाखल झाले होते. मागील काही दिवसांपासून उत्तराखंडमधील डोंगरभागात मुसळधार पाऊस पडत आहे. त्यामुळे दरडी कोसळण्याच्या घटनांमध्ये वाढ झाली आहे. अनेक रस्त्यांवर दरड कोसळल्याने वाहतूक विस्कळीत झाली.
दरम्यान, उत्तराखंडचे मुख्यमंत्री त्रिवेंद्रसिंग रावत यांनी या अपघातात झालेल्या जीवितहानीबद्दल शोक व्यक्त केला आहे.