കണ്ണൂർ : ഏച്ചൂർ കോട്ടത്തിനടുത്തുള്ള സാനു പ്രണോയ് എന്ന 25 കാരൻ മികച്ച ഒരു ചിത്രകാരൻ ആണ്. ചെറുപ്പം മുതൽ ചിത്രരചനയോട് തോന്നിയ കമ്പം സാനു സ്വയം വളർത്തിയെടുക്കുകയായിരുന്നു. ചെറു ചിത്രങ്ങൾ വരച്ച് തീർക്കുന്നതിനപ്പുറം ചിത്രങ്ങളുടെ വേറിട്ട വഴികൾ തേടിയായിരുന്നു ശാസ്ത്രീയമായി ചിത്ര രചന പഠിക്കാത്ത സാനുവിന്‍റെ യാത്ര മുഴുവനും. അങ്ങനെയാണ് പോർച്ചുഗീസ് ഫുട്‌ബോൾ താരം ക്രിസ്റ്റ്യാനോ റൊണാൾഡോയുടെ പടുകൂറ്റൻ പോപ് ആർട്ടിൽ എത്തിപ്പെട്ടത്.
2022 ജൂലൈയിൽ ആണ് സാനുവിന്‍റെ ഇഷ്‌ട താരം കൂടിയായ റൊണാൾഡോയുടെ പോപ് ആർട്ടിന് തുടക്കമിട്ടത്. വ്യത്യസ്‌ത നിറത്തിലുള്ള ചാർട്ടുകൾ ശേഖരിച്ചു. പതിയെ പതിയെ വരച്ചു തുടങ്ങി. പൂർണമായും ഇതിൽ ശ്രദ്ധ ചെലുത്താതെ വെറുതെ കിട്ടുന്ന സമയങ്ങളിൽ ഓരോ ചാർട്ട് പേപ്പറിലായി വരച്ചൊരുക്കി.
ഒടുവിൽ മാസങ്ങളുടെ പരിശ്രമങ്ങൾക്ക് ശേഷമാണ് ക്രിസ്റ്റ്യാനോ റൊണാൾഡോയുടെ 25 അടി നീളവും 15 അടി വീതിയും ഉള്ള പോപ് ആർട്ട് സാനു പ്രണോയ് തയ്യാറാക്കിയത്. ചാർട്ട് പേപ്പറിൽ വർണ്ണക്കടലാസുകളും പെയിന്‍റും ഉപയോഗിച്ചാണ് റൊണാൾഡോയെ വലിയ കാൻവാസിലേക്ക് സാനു പകർത്തിയത്.
104 ചാർട്ട് പേപ്പറിന് മുകളിൽ പലതരത്തിലുള്ള വർണ്ണ കടലസുകൾ ഉപയോഗിച്ചാണ് റൊണാൾഡോയെ വലിയ പ്രതലത്തിലേക്ക് പകർത്തിയത്. ഈ ചാർട്ടുകൾ ഒട്ടിച്ച് ചേർത്തു ഓരോന്നായി നിവർത്തി യോജിപ്പിക്കുന്നത്തോടെയാണ് ചിത്രം പൂർണമാവുന്നത്. വർണ്ണ കടലസുകൾ ഉപയോഗിക്കുന്നതോടൊപ്പം വേണ്ടിടത്ത് കളർ നൽകി ഫെവിക്കോൾ അല്ലെങ്കിൽ മറ്റേതെങ്കിലും പശ കൊണ്ട് ഒട്ടിച്ചാണ് പോപ് ചിത്രങ്ങൾ ഒരുക്കുന്നത്.
ചിത്രത്തിന്‍റെ പൂർണ രൂപം പ്രദർശിപ്പിക്കാൻ വലിയ സ്ഥലം വേണ്ടതിനാൽ വീടിനടുത്തുള്ള വയലിലാണ് ചിത്രം വരച്ചതും പ്രദർശിപ്പിച്ചതും. താഴെ നിന്ന് നോക്കുന്നതിനേക്കാൾ മനോഹരമായി ആകാശ ദൃശ്യങ്ങളിൽ റൊണാൾഡോ തിളങ്ങി നിൽക്കുകയാണ്. റൊണാൾഡോയുടെ പോപ് ആർട്ട് ഇതിനകം സോഷ്യൽ മീഡിയയിൽ ഹിറ്റ്‌ ആയി കഴിഞ്ഞു.
ALSO READ : 'ജീവിതം തളര്‍ത്തി, വര വളര്‍ത്തി'; ശാരീരിക അവശതകളെ ചിത്രം വരയിലൂടെ മറികടന്ന് സമീജ്, ഒരു അതിജീവനത്തിന്‍റെ കഥ
തയ്യാറാക്കിയ ചിത്രങ്ങൾ ക്രിസ്റ്റ്യാനോ റൊണാൾഡോ കാണാൻ ഉള്ള കാത്തിരിപ്പിലാണ് സാനു പ്രണായ്. കൂടാതെ റൊണാൾഡോയുടെ നല്ല വാക്കുകൾക്കായും. കണ്ണൂർ പോളിടെക്‌നിക്കിൽ നിന്ന് ഇലക്ട്രിക്കൽ എഞ്ചിനീയറിങ്ങിൽ ഡിപ്ലോമ നേടിയ സാനു കണ്ണൂരിൽ സ്വകാര്യ കമ്പനിയിൽ ഡിസൈനറാണ് ഇപ്പോൾ. സ്‌കൂൾ കാലയളവിൽ പുരസ്‌കാരങ്ങൾ ഒന്നും തേടിയെത്തിയില്ലെങ്കിലും വേൾഡ് റെക്കോർഡിലേക്ക് ചിത്രം വരച്ചു കയറി എന്ന കൗതുകം കൂടി ഉണ്ട് സാനുവിന്‍റെ ജീവിതത്തിൽ.
2011ൽ ആയിരുന്നു അത്. അന്നത്തെ വേൾഡ് കപ്പ്‌ ക്രിക്കറ്റിൽ ഇന്ത്യയ്ക്ക് വേണ്ടി ജേഴ്‌സി അണിഞ്ഞവരെ സാനു വരച്ചൊരുക്കി. വെറും വരയല്ല. ചായപ്പൊടി കൊണ്ട് ഓരോ ചാർട്ടിലും സാനു ചിത്രങ്ങൾ തീർത്തു. ഒടുവിൽ നടന്നു കയറിയത് ഇന്ത്യ ബുക്ക് ഓഫ് റെക്കോർഡിലും ഏഷ്യ ബുക്ക് റെക്കോർഡിലും. കെപി പ്രകാശിന്‍റെയും എംപി ശ്രീജയുടെയും മകനാണ് സാനു പ്രണോയ്.
