ഇടുക്കി: പത്ത് സെന്‍റ് വരുന്ന ഭൂമിയിൽ നട്ടുപരിപാലിച്ച പടവലമാണ് ഇപ്പോൾ ഇടുക്കി വാത്തിക്കുടി ചെമ്പകപ്പാറയിലെ പ്രധാന ചർച്ചാവിഷയം. ചെമ്പകപ്പാറ വട്ടംതൊട്ടിയിൽ തോമസിന്‍റെ വീട്ടുമുറ്റത്ത് നിൽക്കുന്ന പടവലത്തിലാണ് ഒൻപത് അടിയിൽ അധികം നീളമുള്ള അദ്‌ഭുത പടവലങ്ങ കായ്ച്ച് നിൽക്കുന്നത്. പച്ചക്കറികളും, ഔഷധ സസ്യങ്ങളുമെല്ലാം നട്ടുപരിപാലിക്കുന്ന തോമസിന്‍റെ മുറ്റത്ത് ആദ്യമായിട്ടാണ് അസാമാന്യ വലിപ്പമുള്ള പടവലമുണ്ടായത്.
അദ്‌ഭുത പടവലത്തിന്‍റെ കഥയിങ്ങനെ: ആകെയുള്ളത് 10 സെന്‍റ് സ്ഥലം. അതിനുള്ളിൽ ഒരു വീട് . വീടിന് ചുറ്റും ഔഷധ സസ്യങ്ങളും, പച്ചക്കറിയും, പൂച്ചെടികളും, ഇതാണ് ചെമ്പകപ്പാറ വട്ടംതൊട്ടിയിൽ തോമസിന്‍റെ വീട്ടിലെ സ്ഥിരം കാഴ്ച്ച. തോമസിന്‍റെ ഭാര്യ തങ്കമ്മ പാര്യമ്പര്യ ചികിത്സ നടത്തുകയാണ്. ഒപ്പം ആവശ്യമായ പച്ചക്കറിയും വീട്ടുമുറ്റത്ത് നട്ട് പരിപാലിച്ചു. മൂന്ന് മാസം മുൻപ് ഇളയ മകൾ ഒരു ചെറിയ പച്ചക്കറി തൈ മാതാപിതാക്കൾക്ക് നൽകി.
പാവൽ എന്ന് കരുതി തങ്കമ്മയും തോമസും ചേർന്ന് പരിപാലിച്ചു. വളർന്നപ്പോഴാണ് പടവലമാണെന്ന് മനസിലായത്. ചെടി വളർന്ന് പന്തലിച്ച് പടവലം കായ്ച്ചതോടെയാണ് തോമസിനേയും തങ്കമ്മയേയും നാട്ടുകാരേയും അദ്‌ഭുതപ്പെടുത്തി നീളൻ പാവലം കായ്ച്ച് തുടങ്ങിയത്.
ഒൻപത് അടിയിലധികം നീളമുള്ള പടവലങ്ങയാണ് തോമസിന്‍റെ മുറ്റത്ത് കായ്ച്ച് നിൽക്കുന്നത്. ചെടിയിലുണ്ടായ മുഴുവൻ കായ്‌കൾക്കും അസാമാന്യ വലിപ്പമുണ്ടായത്തിന്‍റെ സന്തോഷത്തിലാണ് തോമസും തങ്കമ്മയും. പടവലം വളർന്ന് നിലത്ത് മുട്ടിയിട്ടും വളർച്ച നിൽക്കാതെ മണ്ണിലൂടെ വളരുന്ന പടവലം കാണാൻ ആളുകളും എത്തിത്തുടങ്ങിയിട്ടുണ്ട്.
പടവലം ഇത്രയും വലിപ്പമുള്ളതിനാൽ കടകളിൽ എടുക്കാറില്ലായെന്ന് തോമസ് പറയുന്നു. അതുകൊണ്ട് തന്നെ ഒരു പടവലം വിളവെടുത്താൽ സമീപത്തുള്ള പത്തിലധികം വീടുകളിൽ സൗജന്യമായി ജൈവ പടവലം നൽകുകയാണ് തോമസും തങ്കമ്മയും.
ചൂട് കാലത്ത് സമൃദ്ധമായി വിളഞ്ഞ് പ്ലം: വേനല്‍ക്കാലത്തും ഹൈറേഞ്ചില്‍ സമൃദ്ധമായി വിളവ് നല്‍കിയിരിക്കുകയാണ് പ്ലം. പ്രധാനമായും ശീതകാലത്ത് മാത്രം ഉണ്ടാകുന്ന പ്ലം ഹൈറേഞ്ചിലെ ചൂടില്‍ സമൃദ്ധമായി വിളയും എന്ന് തെളിയിച്ചിരിക്കുകയാണ് ഇരട്ടയാര്‍ തോവാള സ്വദേശിയായ കളപ്പുരയ്‌ക്കല്‍ ബിജു. വിദേശത്തുനിന്നും ഏജന്‍റ് മുഖാന്തരം എത്തിച്ച സാറ്റ്ലിച്ച് ഇമനം പ്ലമ്മുകളാണ് ബിജുവിന്‍റെ തോട്ടത്തില്‍ സമൃദ്ധമായി വിളഞ്ഞുനില്‍ക്കുന്നത്.
മിതശീതോഷ്‌ണ മേഖലയ്‌ക്കിണങ്ങിയ മികച്ച ഫലസസ്യമാണ് പ്ലം. ഇവ വളരുന്ന ഇടങ്ങില്‍ കായ്‌ക്കാന്‍ നിശ്ചിത ദിവസങ്ങളില്‍ അതിശൈത്യം വേണം. കേരളത്തില്‍ സമുദ്രനിരപ്പില്‍ നിന്ന് 6,500 അടി ഉയരത്തില്‍ സ്ഥിതിചെയ്യുന്ന ഇടുക്കി കാന്തല്ലൂര്‍ മലനിരകളിലാണ് മഞ്ഞുകാല പഴമായ പ്ലം വ്യാപകമായി കൃഷി ചെയ്യപ്പെടുന്നത്.
പകല്‍ താപനില 15 ഡിഗ്രിയും രാത്രി താപനില പൂജ്യവും ആയാല്‍ പ്ലം മികച്ച ആദായം നല്‍കും. എന്നാല്‍, ഹൈറേഞ്ചിലെ ചൂട് കാലാവസ്ഥയിലും പ്ലം സമൃദ്ധമായി വിളയും എന്ന് തെളിയിച്ചിരിക്കുകയാണ് മികച്ച കര്‍ഷകനായ ഇരട്ടയാര്‍ തോവാള സ്വദേശി കളപ്പുരയ്‌ക്കല്‍ ബിജു. വിദേശത്തുനിന്നും ഏജന്‍റ് മുഖേന എത്തിച്ച് പ്ലമ്മുകളാണ് ബിജുവിന്‍റെ തോട്ടത്തില്‍ സമൃദ്ധമായി വിളഞ്ഞുനില്‍ക്കുന്നത്.
