തിരുവനന്തപുരം: പതിനഞ്ചാം കേരള നിയമസഭയുടെ നാലാം സമ്മേളനം വെള്ളിയാഴ്‌ച ആരംഭിക്കും. ഗവര്‍ണറുടെ നയപ്രഖ്യാപന പ്രസംഗത്തോടെയാണ് രണ്ട് ഘട്ടങ്ങളിലായുള്ള സഭ സമ്മേളനം ആരംഭിക്കുന്നത്. ഫെബ്രുവരി 21 തിങ്കളാഴ്‌ച സഭാംഗമായിരുന്ന പി.ടി തോമസിന് അന്ത്യാഞ്ജലി അർപ്പിച്ച് പിരിയും. അന്ന് നിയമസഭ കാര്യോപദേശ സമിതി യോഗം മറ്റ് സഭ നടപടികൾ തീരുമാനിക്കും.
ഗവര്‍ണറുടെ പ്രസംഗത്തിന് നന്ദി രേഖപ്പെടുത്തുന്ന പ്രമേയത്തിന്മേലുള്ള ചര്‍ച്ച ഫെബ്രുവരി 22, 23, 24 തീയതികളിലായി നടക്കും. ഫെബ്രുവരി 25 മുതല്‍ മാര്‍ച്ച് 10 വരെ സഭ സമ്മേളനത്തിന് ഇടവേളയാണ്. 2022-23 സാമ്പത്തിക വര്‍ഷത്തെ ബജറ്റും മറ്റ് അനുബന്ധ രേഖകളും മാര്‍ച്ച് 11-ാം തീയതി ധനമന്ത്രി കെ.എൻ ബാലഗോപാൽ സഭയില്‍ അവതരിപ്പിക്കും.
മാര്‍ച്ച് 14, 15, 16 തീയതികളിലായി ബജറ്റിനെ സംബന്ധിക്കുന്ന പൊതു ചര്‍ച്ച നടക്കുന്നത്. മാര്‍ച്ച് 17ന് സാമ്പത്തിക വര്‍ഷത്തെ ബജറ്റിന്മേലുള്ള അന്തിമ ഉപധനാഭ്യര്‍ഥനകള്‍ സഭ പരിഗണിക്കും. ആദ്യ നാലുമാസത്തെ ചെലവുകള്‍ നിര്‍വഹിക്കുന്നതിനായുള്ള വോട്ട്-ഓണ്‍-അക്കൗണ്ട് മാര്‍ച്ച് 22-ാം തീയതിയും ഉപധനാഭ്യര്‍ഥകളെയും വോട്ട്-ഓണ്‍ അക്കൗണ്ടിനെയും സംബന്ധിക്കുന്ന ധനവിനിയോഗ ബില്ലുകള്‍ യഥാക്രമം മാര്‍ച്ച് 21-ാം തീയതിയും മാര്‍ച്ച് 23-ാം തീയതിയും സഭ പരിഗണിക്കും.
മാര്‍ച്ച് 21, 23 തീയതികളില്‍ സര്‍ക്കാര്‍ കാര്യങ്ങള്‍ക്കായി മാറ്റി വച്ചിട്ടുണ്ട്. ഇത് ഫെബ്രുവരി 21ന് ചേരുന്ന കാര്യോപദേശക സമിതിയുടെ ശിപാര്‍ശയുടെ അടിസ്ഥാനത്തില്‍ സഭ തീരുമാനിക്കും. മാര്‍ച്ച് 23ന് നടപടിക്രമങ്ങൾ പൂർത്തിയാക്കി സമ്മേളനം സമാപിക്കും.
കൊവിഡ് കാലത്ത് നിയമസഭ സമ്മേളിച്ചത് 61 ദിവസം
കൊവിഡ് കാലത്ത് കേരള നിയമസഭ മികച്ച പ്രകടനം കാഴ്‌ചവച്ചതായി സ്‌പീക്കർ പറഞ്ഞു. പാര്‍ലമെന്‍റും മറ്റ് സംസ്ഥാന നിയമസഭകളും സമ്മേളിച്ച ദിനങ്ങളുടെ എണ്ണത്തില്‍ ഗണ്യമായ കുറവ് ഉണ്ടായപ്പോൾ കേരള നിയമസഭ 61 ദിവസമാണ് സമ്മേളിച്ചത്.
നിയമസഭ സമിതികളുടെ പ്രവര്‍ത്തനം ഫലപ്രദമാക്കാന്‍ ഓണ്‍ലൈന്‍ യോഗം നടത്താൻ
ഇന്ത്യയില്‍ ആദ്യം തീരുമാനിച്ചത് കേരളത്തിലാണ്. ഇത് സമിതികളുടെ പ്രവര്‍ത്തനം കാര്യക്ഷമമായി മുന്നോട്ടു പോകാന്‍ സഹായിച്ചു.
ജനാധിപത്യത്തിന്‍റെ കേരള മാതൃക എന്ന് വിശേഷിപ്പിക്കാവുന്ന ഈ മികച്ച നേട്ടം അഭിമാനകരമാണെന്ന് സ്‌പീക്കര്‍ പറഞ്ഞു. സമ്മേളനത്തിൻ്റെ വെബ് കാസ്റ്റിങ് 15 മിനിട്ട് ഇടവേളയിൽ സംപ്രേക്ഷണം ചെയ്യും. സന്ദർശകരെ കൊവിഡ് മാനദണ്ഡം പാലിച്ച് അനുവദിക്കാനും തീരുമാനിച്ചിട്ടുണ്ട്.
Also read: മേയര്‍ ആര്യ രാജേന്ദ്രനും സച്ചിന്‍ ദേവ് എംഎല്‍എയും വിവാഹിതരാകുന്നു
