ನವದೆಹಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಪಂದ್ಯ ನಡೆಯುವ ವೇಳೆ ಫೋಟೋ ಮತ್ತು ವಿಡಿಯೋಗಳನ್ನು ತೆಗೆದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡದಂತೆ ಆಟಗಾರರು, ವೀಕ್ಷಕ ವಿವರಣೆಗಾರರು (ಕಾಮೆಂಟೇಟರ್ಸ್) ಸೇರಿದಂತೆ ಫ್ರಾಂಚೈಸಿ ಮಾಲೀಕರಿಗೆ ಬಿಸಿಸಿಐ ಖಡಕ್ ಎಚ್ಚರಿಕೆ ಸಂದೇಶ ರವಾನಿಸಿದೆ.
ವರದಿಯ ಪ್ರಕಾರ, ಭಾರತದ ಮಾಜಿ ಬ್ಯಾಟರ್‌ವೊಬ್ಬರು ಇತ್ತೀಚೆಗೆ ನಡೆದ ಐಪಿಎಲ್ ಪಂದ್ಯವೊಂದರಲ್ಲಿ ವೀಕ್ಷಕ ವಿವರಣೆಗಾರರಾಗಿದ್ದರು. ಈ ಸಂದರ್ಭದಲ್ಲಿ ಪಂದ್ಯದ ವಿವರಣೆ ಮಾಡುವಾಗ ಫೋಟೋ ಕ್ಲಿಕ್ಕಿಸಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದರು. ಇದಕ್ಕೆ ಐಪಿಎಲ್ ಪ್ರಸಾರ ಹಕ್ಕುದಾರರು ಬಿಸಿಸಿಐ ಮುಂದೆ ತೀವ್ರ ಅಸಮಾಧಾನ ಹೊರಹಾಕಿದ್ದರು.
ಕೂಡಲೇ ಕ್ರಮ ಕೈಗೊಂಡ ಬಿಸಿಸಿಐ ಫೋಟೋವನ್ನು ತೆಗೆದುಹಾಕುವಂತೆ ಕಾಮೆಂಟೇಟರ್ಗೆ ಆದೇಶಿಸಿದೆ. ಅಲ್ಲದೇ ಪಂದ್ಯದ ವೇಳೆ ಲೈವ್ ವಿಡಿಯೋ ಅಥವಾ ಫೋಟೋವನ್ನು ಕ್ಲಿಕ್ಕಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಹಾಕಿದರೆ ದಂಡ ಪಾವತಿಸಬೇಕಾಗುತ್ತದೆ. ಕೇವಲ ಕಾಮೆಂಟೇಟರ್ಸ್ಗೆ ಮಾತ್ರವಲ್ಲದೇ ಆಟಗಾರರು, ಫ್ರಾಂಚೈಸಿ ಮಾಲೀಕರಿಗೂ ಈ ನಿಯಮ ಅನ್ವಯ ಎಂದಿದೆ.
ಬಿಸಿಸಿಐ ಅಧಿಕಾರಿಗಳು ಮಾಧ್ಯಮಕ್ಕೆ ನೀಡಿದ ಮಾಹಿತಿ ಪ್ರಕಾರ, ಪಂದ್ಯದ ಪ್ರಸಾರದ ಹಕ್ಕುಗಳಿಗಾಗಿ ಐಪಿಎಲ್ ಪ್ರಸಾರಕರು ಬಿಸಿಸಿಐಗೆ ಸಾವಿರಾರು ಕೋಟಿ ರೂಪಾಯಿಗಳನ್ನು ಪಾವತಿಸಿದ್ದಾರೆ. ಹಾಗಾಗಿ ಪಂದ್ಯ ನಡೆಯುವ ವೇಳೆ ಲೈವ್ ವಿಡಿಯೋ ಮಾಡುವುದಾಗಲಿ ಅಥವಾ ಫೋಟೋ ತೆಗೆಯುವುದಾಗಲಿ ನಿರ್ಬಂಧಿಸಲಾಗಿದೆ. ಒಂದು ವೇಳೆ ನಿಯಮ ಉಲ್ಲಂಘಿಸಿದಲ್ಲಿ ಅಂಥವರ ವಿರುದ್ದ ಬಿಸಿಸಿಐ ಸೂಕ್ತ ಕ್ರಮ ಕೈಗೊಳ್ಳಲಿದೆ.
ಇತ್ತೀಚೆಗೆ ತಂಡವೊಂದು ಪಂದ್ಯದ ಲೈವ್ ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿತ್ತು. ಆ ವಿಡಿಯೋ 10 ಲಕ್ಷಕ್ಕೂ ಮೀರಿ ವೀಕ್ಷಣೆ ಕಂಡಿತ್ತು. ಇದನ್ನು ಗಮನಿಸಿದ ಬಿಸಿಸಿಐ ಆ ತಂಡಕ್ಕೆ 9 ಲಕ್ಷ ದಂಡ ವಿಧಿಸಿದೆ ಎಂದು ಅಧಿಕಾರಿ ಮಾಧ್ಯಮ ಹೇಳಿಕೆಯಲ್ಲಿ ತಿಳಿಸಿದರು.
ಫ್ರಾಂಚೈಸಿಗಳು ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಲ್ಲಿ ಸೀಮಿತ ಸಂಖ್ಯೆಯ ಫೋಟೋಗಳನ್ನು ಮಾತ್ರ ಪೋಸ್ಟ್ ಮಾಡಬಹುದಾಗಿದೆ ಮತ್ತು ಪಂದ್ಯದ ಅಪ್‌ಡೇಟ್‌ ಬಗ್ಗೆ ತಿಳಿಸಬಹುದು ಎಂದು ಬಿಸಿಸಿಐ ಸ್ಪಷ್ಟಪಡಿಸಿದೆ.
ಇದನ್ನೂ ಓದಿ: ಹೈದರಾಬಾದ್ ಸವಾಲು ಗೆಲ್ಲುತ್ತಾ ಆರ್ಸಿಬಿ: ಸೋತರೆ ಪ್ಲೇ ಆಫ್ ರೇಸ್ನಿಂದ ಬಹುತೇಕ ಔಟ್ - rcb vs srh
