ಚಾಮರಾಜನಗರ: ನೆರೆ ರಾಜ್ಯಗಳಲ್ಲಷ್ಟೇ ಅಲ್ಲದೇ ವಿದೇಶಗಳಿಂದಲೂ ನಂದಿನಿ ಹಾಲಿಗೆ ಹೆಚ್ಚಿನ ಬೇಡಿಕೆ ಇದೆ. ನೇಪಾಳ, ಭೂತಾನ್ ದೇಶಗಳಿಗೆ ಇದೀಗ ಚಾಮರಾಜನಗರ ಹಾಲು ಒಕ್ಕೂಟ (ಚಾಮುಲ್) ಹಾಲು ಪೂರೈಕೆ ಮಾಡುತ್ತಿದೆ.
ಚಾಮುಲ್ನಿಂದ ಭೂತಾನ್ಗೆ 22.5 ಲಕ್ಷ ಲೀ. ಗುಡ್ ಲೈಫ್ ಗೋಲ್ಡ್ ಹಾಲು ರಫ್ತಾಗುತ್ತಿದ್ದು, ನೇಪಾಳಕ್ಕೂ ಬೇಡಿಕೆಗೆ ತಕ್ಕಂತೆ ಹಾಲು ಪೂರೈಕೆ ಮಾಡಲಾಗ್ತಿದೆ. ಇದರೊಟ್ಟಿಗೆ, ಅಸ್ಸಾಂ ರೈಫಲ್ಸ್, ಜಮ್ಮು ಮತ್ತು ಕಾಶ್ಮೀರದ ಸೈನಿಕರಿಗೂ ಹಾಲು ಪೂರೈಕೆ ಮಾಡಲಾಗ್ತಿದೆ. ಅಸ್ಸಾಂ ರೈಫಲ್ಸ್ಗೆ ಪ್ರತಿ ತಿಂಗಳು 4 ಲಕ್ಷ ಲೀ. ಗುಡ್ ಲೈಫ್ ಗೋಲ್ಡ್ ಹಾಲು ನೀಡಲಾಗ್ತಿದೆ.
ಇದನ್ನೂ ಓದಿ: ವಿದೇಶದಲ್ಲೂ ಜನಪ್ರಿಯ 'ನಂದಿನಿ' ಹಾಲು ಉತ್ಪನ್ನಗಳು: ಬಾಂಗ್ಲಾದಿಂದ 500 ಟನ್ ಹಾಲಿನ ಪುಡಿ ಬೇಡಿಕೆ
ಉಳಿದಂತೆ, ನೆರೆಯ ರಾಜ್ಯ ಆಂಧ್ರಪ್ರದೇಶಕ್ಕೆ ವಿಜಯವಜ್ರ ಹೆಸರಿನಲ್ಲಿ ಪ್ರತಿ ತಿಂಗಳು 12 ಲಕ್ಷ ಲೀ., ತೆಲಂಗಾಣ ಸರ್ಕಾರಕ್ಕೆ 4 ಲಕ್ಷ ಲೀ. ಹಾಲು ಪೂರೈಸಲಾಗುತ್ತಿದೆ. ಅಲ್ಲಿನ ಸರ್ಕಾರಗಳು ಈ ಹಾಲನ್ನು ಅಂಗನವಾಡಿ ಮಕ್ಕಳು, ಆಶಾ ಕಾರ್ಯಕರ್ತೆಯರು, ಶಾಲಾ ಮಕ್ಕಳಿಗೆ ವಿತರಿಸುತ್ತದೆ.
ಚಾಮರಾಜನಗರ ಹಾಲು ಒಕ್ಕೂಟ ಆರಂಭಗೊಂಡು ಕೇವಲ 3 ವರ್ಷವಷ್ಟೇ ಆಗಿದ್ದು, ವಿದೇಶಗಳಿಗೂ ಹಾಲು ರಫ್ತು ಮಾಡುವ ಮೂಲಕ ಗಮನ ಸೆಳೆದಿದೆ.
