ಕೊಚ್ಚಿ (ಕೇರಳ): ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಹರಾಜಿನಲ್ಲಿ ಕನ್ನಡಿಗ ಮನೀಷ್ ಪಾಂಡೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪಾಲಾಗಿದ್ದಾರೆ. ಆರ್ಆರ್ ಮತ್ತು ಆರ್ಸಿಬಿ ನಡುವಿನ ಪೈಪೋಟಿ ನಡುವೆಯೇ ಡೆಲ್ಲಿ 2.4 ಕೋಟಿ ರೂ ಕೊಟ್ಟು ಮನೀಷ್ರನ್ನು ಖರೀದಿಸಿತು.
ಅನುಭವಿ ಬ್ಯಾಟರ್ ಮನೀಶ್ ಪಾಂಡೆ ಕಳೆದ ಬಾರಿ ಲಖನೌ ಸೂಪರ್ ಜೈಂಟ್ಸ್‌ (ಎಲ್ಎಸ್ಜಿ) ತಂಡಕ್ಕೆ 4 ಕೋಟಿ ರೂ.ಗೆ ಹರಾಜಾಗಿಗಿದ್ದರು. ಆದರೆ, ಈ ಬಾರಿ ಕಡಿಮೆ ಬೆಲೆಗೆ ಬಿಕರಿ ಆಗಿದ್ದಾರೆ. ಪಾಂಡೆ ಅವರ ಮೂಲ ಬೆಲೆ 1 ಕೋಟಿ ರೂ. ನಿಗದಿಯಾಗಿತ್ತು. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಬಿಡ್ ಮಾಡಲು ಪ್ರಯತ್ನಿಸಿದವು. ನಂತರ ರಾಜಸ್ಥಾನ ರಾಯಲ್ಸ್ ಮತ್ತು ಆರ್ಸಿಬಿ ನಡುವೆ ಪೈಪೋಟಿ ನಡೆಯಿತು. ಅಂತಿಮವಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮನೀಷ್ ಪಾಂಡೆ ಅವರನ್ನು ಸೇರಿಸಿಕೊಂಡಿತು.
ಇದನ್ನೂ ಓದಿ: ಕೆರಿಬಿಯನ್ ಕ್ರಿಕೆಟಿಗನಿಗೆ 16 ಕೋಟಿ ರೂ! ಕೆ.ಎಲ್ ರಾಹುಲ್‌ ತಂಡದಲ್ಲಿ ಪೂರನ್ ಆಟ
ಐವರನ್ನು ಖರೀದಿಸಿದ ಆರ್ಸಿಬಿ: ಮಿನಿ ಹರಾಜಿನಲ್ಲಿ ಆರ್ಸಿಬಿ ತಂಡ ಇದುವರೆಗೆ ಇಬ್ಬರು ವಿದೇಶಿಗರು ಸೇರಿದಂತೆ ಐವರು ಆಟಗಾರರನ್ನು ಖರೀದಿಸಿದೆ. ಇದರಲ್ಲಿ ಇಂಗ್ಲೆಂಡ್ನ ಬ್ಯಾಟರ್ ವಿಲ್ ಜಾಕ್ಸ್ ಅವರಿಗೆ 3.20 ಕೋಟಿ ರೂಪಾಯಿ ನೀಡಿ ಕೊಂಡುಕೊಂಡಿದೆ. ಜೊತೆಗೆ, ಇಂಗ್ಲೆಂಡ್ನ ಮತ್ತೊಬ್ಬ ಆಟಗಾರರಾದ ಬೌಲರ್ ರೀಸ್ ಟೋಪ್ಲಿ ಅವರನ್ನೂ 1.9 ಕೋಟಿಗೆ ಆರ್ಸಿಬಿ ತಂಡ ತನ್ನ ತೆಕ್ಕೆಗೆ ಹಾಕಿಕೊಂಡಿದೆ.
ಉಳಿದಂತೆ, ಬೌಲರ್ ರಾಜನ್ ಕುಮಾರ್ ಅವರನ್ನು 70 ಲಕ್ಷ ರೂ ಮತ್ತು ಆಲ್ರೌಂಡರ್ ಮನೋಜ್ ಭಾಂಡ ಹಾಗೂ ಬೌಲರ್ ಹಿಮಾಂಶು ಶರ್ಮಾ ಅವರನ್ನು ತಲಾ 20 ಲಕ್ಷ ರೂ ಕೊಟ್ಟು ಆರ್ಸಿಬಿ ಫ್ರಾಂಚೈಸಿ ಖರೀದಿಸಿತು. ಆರ್ಸಿಬಿ ಖಾತೆಯಲ್ಲಿ ಇನ್ನೂ 2.5 ಕೋಟಿ ರೂ ಬಾಕಿ ಉಳಿದಿದೆ. ಒಟ್ಟಾರೆ 23 ಆಟಗಾರರು ತಂಡದ ಬಳಿಯಿದ್ದು, ಇದರಲ್ಲಿ 8 ಜನ ವಿದೇಶಿ ಕ್ರಿಕೆಟಿಗರನ್ನು ಆರ್ಸಿಬಿ ಹೊಂದಿದೆ.
ಇದನ್ನೂ ಓದಿ: ₹18.5 ಕೋಟಿ! ಐಪಿಎಲ್ ಟೂರ್ನಿ ಇತಿಹಾಸದಲ್ಲೇ ಅತಿ ದುಬಾರಿ ಆಟಗಾರ ಸ್ಯಾಮ್ ಕರ್ರಾನ್!
