ನವದೆಹಲಿ: ಪಾಸ್ಪೋರ್ಟ್ ಪಡೆಯಲು ಹೇರಿದ್ದ ಕಠಿಣ ಷರತ್ತುಗಳನ್ನು ಸಡಿಲಗೊಳಿಸಿದ ವಿದೇಶಾಂಗ ಇಲಾಖೆಯು, ಇದನ್ನು ಇನ್ನಷ್ಟು ಸರಳೀಕರಣಗೊಳಿಸಿ ವಿತರಣೆ ಸಂಖ್ಯೆ ಹೆಚ್ಚಿಸಲು ನಿರ್ಧರಿಸಿದೆ.
ರಾಜ್ಯಸಭೆಯ ಪ್ರಶ್ನೋತ್ತರ ವೇಳೆ ಪ್ರಶ್ನೆಯೊಂದಕ್ಕೆ ಉತ್ತರಿಸಿ ಮಾತನಾಡಿದ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು, ಇ-ಪಾಸ್ಪೋರ್ಟ್ಗಳನ್ನು ಪರಿಚಯಿಸುವ ನಿಟ್ಟಿನಲ್ಲಿ ಸರ್ಕಾರ ಹೆಚ್ಚಿನ ಕೆಲಸ ಮಾಡುತ್ತಿದ್ದು, ಮೊದಲ ಹಂತದಲ್ಲಿ 22 ಮಿಲಿಯನ್ (2.2 ಕೋಟಿ) ಪಾಸ್ಪೋರ್ಟ್ ವಿತರಿಸುವ ಗುರಿ ಇರಿಸಿಕೊಂಡಿದೆ ಎಂದರು.
ಸುಧಾರಿತ ಭದ್ರತಾ ವೈಶಿಷ್ಟ್ಯಗಳನ್ನು ಹೊಂದಿರುವ ಚಿಪ್ ಸಹಿತ ಇ- ಪಾಸ್ಪೋರ್ಟ್ಗಳನ್ನು ನಾಗರಿಕರು ಪಡೆಯಬಹುದಾಗಿದೆ. ಅರ್ಜಿದಾರರ ವೈಯಕ್ತಿಕ ವಿವರಗಳನ್ನು ಡಿಜಿಟಲ್ ಸಹಿ ಮಾಡಿದ ಚಿಪ್‌ನಲ್ಲಿ ಸಂಗ್ರಹಿಸಲಾಗುವುದು. ಇದು ಪ್ರಸ್ತುತ ಭೌತಿಕ ಪಾಸ್‌ಪೋರ್ಟ್ನ ಕಿರುಪುಸ್ತಕದ ಬದಲಿ ರೂಪವಾಗಿದೆ ಎಂದು ಅವರು ವಿವರಿಸಿದರು.
ಒಂದು ವೇಳೆ ಯಾರಾದರೂ ಚಿಪ್ ಅನ್ನು ಹಾಳುಮಾಡಿದರೆ, ಪಾಸ್ಪೋರ್ಟ್ದಾರರನ್ನು ದೃಢೀಕರಣ ಸಿಸ್ಟಮ್ ಮೂಲಕ ಕಾರ್ಡ್ದಾರರನ್ನು ಪತ್ತೆಹಚ್ಚಬಹುದಾಗಿದೆ. ಉದ್ದೇಶಿತ ಯೋಜನೆಯು ಟೆಂಡರ್ನ ಕೊನೆಯ ಹಂತದಲ್ಲಿದೆ. ಇದು ಅಂತಾರಾಷ್ಟ್ರೀಯ ಮತ್ತು ದೇಶಿಯ ಎಂಬ ಎರಡು ಅಂಶಗಳನ್ನು ಒಳಗೊಂಡಿದೆ ಎಂದು ಮಾಹಿತಿ ನೀಡಿದ್ದಾರೆ.
ಮೊದಲ ಹಂತದಲ್ಲಿ ಸುಮಾರು 22 ಮಿಲಿಯನ್ ಇನ್‌ಲೇಸ್ ಎಲೆಕ್ಟ್ರಾನಿಕ್ ಪಾಸ್ಪೋರ್ಟ್ಗಳನ್ನು ವಿತರಿಸಲು ಬಯಸಿದ್ದೇವೆ. ನಾಸಿಕ್ನಲ್ಲಿರುವ ಇಂಡಿಯಾ ಸೆಕ್ಯುರಿಟಿ ಪ್ರೆಸ್ಗೆ (ಐಎಸ್‌ಪಿ) ಇ-ಪಾಸ್ಪೋರ್ಟ್ ತಯಾರಿಕೆಗೆ ಸರ್ಕಾರ ಅನುಮೋದನೆ ನೀಡಿದೆ ಎಂದು ಸಚಿವ ಜೈಶಂಕರ್ ವಿವರಿಸಿದರು.
