ಪಾಟ್ನಾ (ಬಿಹಾರ): ವಿಚಿತ್ರ ವದಂತಿಯೊಂದು ಬಿಹಾರದಲ್ಲಿ ಕಾಳ್ಗಿಚ್ಚಿನಂತೆ ಹರಡುತ್ತಿದ್ದು, ಇದರ ಪರಿಣಾಮ ಜಿಯುತಿಯಾ ಹಬ್ಬದ ಈ ವೇಳಯಲ್ಲಿ ಪಾರ್ಲೆ-ಜಿ ಬಿಸ್ಕತ್ತುಗಳನ್ನು ಕೊಳ್ಳಲು ಜನರು ಅಂಗಡಿಗಳಿಗೆ ಮುಗಿಬೀಳುತ್ತಿದ್ದಾರೆ.
ಪ್ರತಿವರ್ಷ ರಾಜ್ಯದಲ್ಲಿ ಆಚರಿಸುವ ಜಿಯುತಿಯಾ ಹಬ್ಬದಲ್ಲಿ ತಾಯಂದಿರು ತಮ್ಮ ಮಕ್ಕಳ ದೀರ್ಘ, ಆರೋಗ್ಯಕರ ಮತ್ತು ಸಮೃದ್ಧ ಜೀವನಕ್ಕಾಗಿ 24 ಗಂಟೆಗಳ ಕಾಲ ಉಪವಾಸ ಮಾಡುತ್ತಾರೆ. ಆದರೆ, ಈ ಬಾರಿ ಹೊಸದೊಂದು ವದಂತಿ ಹರಡಿದೆ. ಹಬ್ಬದ ವೇಳೆ ತಾಯಂದಿರು ತಮ್ಮ ಮಕ್ಕಳು, ಅದರಲ್ಲಿಯೂ ಗಂಡು ಮಕ್ಕಳಿಗೆ ಪಾರ್ಲೆ-ಜಿ ಬಿಸ್ಕತ್ತುಗಳನ್ನು ತಿನ್ನಿಸಬೇಕು. ಅವರು ತಿನ್ನಲು ನಿರಾಕರಿಸಿದರೆ, ಭವಿಷ್ಯದಲ್ಲಿ ಅಹಿತಕರ ಘಟನೆಗಳನ್ನು ಎದುರಿಸಬಹುದು ಎಂಬ ವದಂತಿ ಹರಡಿದೆ.
ಸೀತಾಮರ್ಹಿ, ಮೋತಿಹಾರಿ ಸೇರಿದಂತೆ ವಿವಿಧ ಜಿಲ್ಲೆಗಳಲ್ಲಿ ಈ ವದಂತಿ ಹೇಗೆ ಹರಡಿತೋ ಗೊತ್ತಿಲ್ಲ, ಆದರೆ ಜನರು ಮಾತ್ರ ಅಂಗಡಿಗಳ ಮುಂದೆ ಪಾರ್ಲೆ-ಜಿ ಬಿಸ್ಕತ್ತುಗಳನ್ನು ಖರೀದಿಸಲು ಸಾಲುಗಟ್ಟಿ ನಿಂತಿರುವ ದೃಶ್ಯಗಳು ಕಂಡು ಬಂದಿವೆ. ಇನ್ನು ತಿಳಿದ ಕೆಲವರು ಕಾಳ ಸಂತೆಯಲ್ಲಿಯೂ ಪಾರ್ಲೆ-ಜಿ ಬಿಸ್ಕತ್ ಮಾರಾಟ ಮಾಡುತ್ತಿದ್ದಾರೆ. 5 ರೂ. ಬಿಸ್ಕತ್ ಪ್ಯಾಕೆಟ್ ಅನ್ನು 50 ರೂಪಾಯಿಗೆ ಮಾರಾಟ ಮಾಡಲಾಗುತ್ತಿದೆ ಎಂದು ಸೀತಾಮರ್ಹಿ ಜಿಲ್ಲೆಯ ಪೊಲೀಸ್ ವರಿಷ್ಠಾಧಿಕಾರಿ ಹರ್ ಕಿಶೋರ್ ರೈ ತಿಳಿಸಿದ್ದಾರೆ.
