ನವದೆಹಲಿ: ಕೊರೊನಾ ನಿಯಂತ್ರಣಕ್ಕಾಗಿ ಕೇಂದ್ರ ಸರ್ಕಾರ 2 ಡೋಸ್ ಕೊವ್ಯಾಕ್ಸಿನ್, ಕೋವಿಶೀಲ್ಡ್ ಲಸಿಕೆ ಅಲ್ಲದೇ ಬೂಸ್ಟರ್ ಡೋಸ್ ಅನ್ನೂ ಉಚಿತವಾಗಿ ನೀಡುತ್ತಿದೆ. ಅದರ ಜೊತೆಗೆ ಇದೀಗ 18 ವರ್ಷ ಮೇಲ್ಪಟ್ಟವರಿಗೆ ಬಯೋಲಾಜಿಕಲ್ ಇ ಕಾರ್ಬೆವಾಕ್ಸ್ ಲಸಿಕೆಯನ್ನು ಮುನ್ನೆಚ್ಚರಿಕಾ ಡೋಸ್ ಆಗಿ ತೆಗೆದುಕೊಳ್ಳಲು ಅನುಮತಿ ನೀಡಿದೆ ಎಂದು ತಿಳಿದುಬಂದಿದೆ.
ಏಕವ್ಯಕ್ತಿ ಎರಡು ಮಾದರಿಯ ಲಸಿಕೆಯನ್ನು ಪಡೆಯಲು ಅನುಮತಿಸಿರುವುದು ಇದೇ ಮೊದಲಾಗಿದೆ. ಅದರಲ್ಲೂ ಬೂಸ್ಟರ್ ಡೋಸ್ಗೆ ಅನುಮತಿಸಿರುವುದು ವಿಶೇಷವಾಗಿದೆ. ಇಮ್ಯುನೈಸೇಶನ್‌ ರಾಷ್ಟ್ರೀಯ ತಾಂತ್ರಿಕ ಸಲಹಾ ಸಮಿತಿಯ ಶಿಫಾರಸಿನ ಮೇರೆಗೆ ಕೇಂದ್ರ ಆರೋಗ್ಯ ಸಚಿವಾಲಯ ಇದನ್ನು ಅನುಮೋದಿಸಿದೆ ಎಂದು ಗೊತ್ತಾಗಿದೆ.
18 ವರ್ಷಕ್ಕಿಂತ ಮೇಲ್ಪಟ್ಟವರು ಕೊವ್ಯಾಕ್ಸಿನ್ ಮತ್ತು ಕೋವಿಶೀಲ್ಡ್ ಪಡೆದ 6 ತಿಂಗಳು ಅಥವಾ 26 ವಾರಗಳ ನಂತರ ಕಾರ್ಬೆವಾಕ್ಸ್ ಅನ್ನು ಮುನ್ನೆಚ್ಚರಿಕೆ ಡೋಸ್ ಆಗಿ ಹಾಕಿಸಿಕೊಳ್ಳಬಹುದು. ಕಾರ್ಬೆವಾಕ್ಸ್ ವೈವಿಧ್ಯಮಯ ಕೋವಿಡ್ ಲಸಿಕೆಯಾಗಿರುವುದರಿಂದ ಈ ವಯೋಮಾನದವರಲ್ಲಿ ಹೆಚ್ಚಿನ ರೋಗ ನಿರೋಧಕತೆ ಉತ್ಪಾದಿಸಲು ಈ ಬೂಸ್ಟರ್ ಡೋಸ್ ನೆರವಾಗಲಿದೆ ಎಂದು ಹೇಳಲಾಗಿದೆ.
ಈಗಾಗಲೇ ನೀಡಲಾಗಿರುವ ಮಾರ್ಗಸೂಚಿಗಳ ಪ್ರಕಾರ ಕೊವ್ಯಾಕ್ಸಿನ್ ಅಥವಾ ಕೋವಿಶೀಲ್ಡ್ ಅನ್ನು ಬೂಸ್ಟರ್ ಡೋಸ್ ಆಗಿ ಪಡೆದುಕೊಳ್ಳಲು ಅನುಮತಿಸಲಾಗಿದೆ. ಕಾರ್ಬೆವಾಕ್ಸ್ ಡೋಸ್ ಪಡೆದುಕೊಳ್ಳಲು ನೀಡಿದ ಅನುಮತಿ ಮಾರ್ಗಸೂಚಿಗಳಲ್ಲಿ ಹೆಚ್ಚುವರಿಯಾಗಿದೆ.
ಸ್ಥಳೀಯವಾಗಿ ಉತ್ಪಾದಿಸಲಾದ ಬಯೋಲಾಜಿಕಲ್ ಲಸಿಕೆಯಾದ ಕಾರ್ಬೆವಾಕ್ಸ್ ಅನ್ನು ಈ ಮೊದಲು 12-14 ವರ್ಷದ ವಯೋಮಾನದ ಮಕ್ಕಳಿಗೆ ಮಾತ್ರ ನೀಡಲು ಅನುಮೋದಿಸಲಾಗಿತ್ತು.
ಕೊವಾಕ್ಸಿನ್ ಮತ್ತು ಕೋವಿಶೀಲ್ಡ್ ಲಸಿಕೆಯ ಡೋಸ್ ಪಡೆದ ಆಯ್ದ ವ್ಯಕ್ತಿಗಳ ಮೇಲೆ ನಡೆಸಲಾದ ಪ್ರಯೋಗದಲ್ಲಿ ಕಾರ್ಬೆವಾಕ್ಸ್ ಬೂಸ್ಟರ್ ಡೋಸ್ ಹೆಚ್ಚಿನ ಫಲಿತಾಂಶ ತಂದಿದೆ. ಬೂಸ್ಟರ್ ಡೋಸ್ ಆಗಿ ಪಡೆದ ವ್ಯಕ್ತಿಗಳಲ್ಲಿ ಪ್ರತಿಕಾಯಗಳು ಗಮನಾರ್ಹವಾಗಿ ಹೆಚ್ಚಳ ಕಂಡಿವೆ. ಹೀಗಾಗಿ ಇದು ಸೋಂಕಿನ ವಿರುದ್ಧ ಇನ್ನಷ್ಟು ರಕ್ಷಣೆ ನೀಡುತ್ತದೆ ಎಂಬುದು ಅಧ್ಯಯನದಲ್ಲಿ ಕಂಡುಬಂದಿದೆ.
ಓದಿ: ಕುಡಿದ ಅಮಲಿನಲ್ಲಿದ್ದವ ಸರಿರಾತ್ರಿ ಮನೆಗೆ ಹೋಗಲು ಸರ್ಕಾರಿ ಬಸ್ಸನ್ನೇ ಕದ್ದ!
