ಬಗಾಹಾ, ಬಿಹಾರ: ಬಿಹಾರದಲ್ಲಿ ಹಾವಿನ ಮುಖದ ರೂಪವಿರುವ ಚಿಟ್ಟೆಯೊಂದು ಕಾಣಿಸಿಕೊಂಡು ಕೌತುಕ ಮೂಡಿಸಿದೆ. ರಾತ್ರಿ ವೇಳೆ ಬಲ್ಬ್ ಬೆಳಕಿಗೆ ಬಂದ ಚಿಟ್ಟೆ ಕಂಡು ಜನರು ಕೆಲಕಾಲ ಆಶ್ಚರ್ಯಚಕಿತರಾಗಿ ಇದು ಹಾವಿರಬಹುದೇ ಎಂದು ಅನುಮಾನದಿಂದ ನೋಡಿದ್ದಾರೆ. ಬಳಿಕ ಚಿಟ್ಟೆ ಎಂದು ಗೊತ್ತಾಗಿ, ಈ ವಿಚಿತ್ರ ಚಿಟ್ಟೆಯನ್ನು ವನದೇವಿಯ ಅವತಾರ ಎಂದು ಪರಿಗಣಿಸಿ ತುಪ್ಪದ ದೀಪ ಹಚ್ಚಿ ಪೂಜಿಸಿದ್ದಾರೆ.
ಚಂಪಾರಣ್ಯ ಅರಣ್ಯಪ್ರದೇಶದ ಅಂಚಿನಲ್ಲಿರುವ ಬಗಾಹಾದಲ್ಲಿ ಇಂತಹ ಅಪರೂಪದ ಜಾತಿಯ ಕೀಟಗಳು ಕಂಡುಬರುತ್ತವೆ. ಹಾವಿನಂತೆ ಕಂಡುಬಂದ ಈ ಚಿಟ್ಟೆಯನ್ನು ಅಟ್ಲಾಸ್ ಎಂದು ಕರೆಯಲಾಗುತ್ತದೆ. ಇದು ಪತಂಗಳಲ್ಲಿಯೇ ದೊಡ್ಡ ದೇಹ ಹೊಂದಿದೆ. ಈ ಚಿಟ್ಟೆ ತನ್ನ ಜೀವಕ್ಕೆ ಬೆದರಿಕೆ ಬಂದಾಗ, ಪರಭಕ್ಷಕಗಳನ್ನು ಹೆದರಿಸಲು ಹಾವಿನ ತಲೆಯಂತೆ ಕಾಣುವ ತನ್ನ ರೆಕ್ಕೆಗಳನ್ನು ಬಡಿಯುತ್ತದೆ.
ಈ ದೊಡ್ಡ ಆಕಾರದ ಅಪರೂಪದ ಚಿಟ್ಟೆ ಹಗಲಿನಲ್ಲಿ ವಿರಳವಾಗಿ ಕಂಡುಬರುತ್ತದೆ. ಇದು ರಾತ್ರಿ ವೇಳೆಯಲ್ಲಿ ಸಂಚರಿಸುವ ಕೀಟವಾಗಿದೆ. ಅತಿಯಾದ ಬೆಳಕಿಗೆ ಇದು ಆಕರ್ಷಿತವಾಗಿ ಒಂದೆಡೆ ಕುಳಿತುಕೊಳ್ಳುತ್ತದೆ. ಅಲ್ಲದೇ, ಇದು ಹಲವು ದಿನಗಳವರೆಗೆ ಒಂದೇ ಸ್ಥಳದಲ್ಲಿ ಠಿಕಾಣಿ ಹೂಡುತ್ತದೆ.
ಅಟ್ಲಾಸ್ ಚಿಟ್ಟೆ ಎಲ್ಲೆಲ್ಲಿ ಇದೆ: ಈ ಅಟ್ಲಾಸ್ ಚಿಟ್ಟೆ ಭಾರತವಲ್ಲದೇ ಆಫ್ರಿಕಾ, ಸ್ಪೇನ್, ಜಪಾನ್, ಚೀನಾ, ಮಲೇಷ್ಯಾ, ಅಮೆರಿಕ ಮೊದಲಾದ ದೇಶಗಳಲ್ಲಿ ಕಂಡುಬರುತ್ತದೆ. ಇದನ್ನು ಆಯಾ ದೇಶಗಳಲ್ಲಿ ಬೇರೆ ಬೇರೆ ಹೆಸರುಗಳಿಂದ ಕರೆಯಲಾಗುತ್ತದೆ. ಆಫ್ರಿಕಾದಲ್ಲಿ ಇದನ್ನು ಆಫ್ರಿಕನ್ ಮೂನ್ ಚಿಟ್ಟೆ ಎಂದರೆ, ಸ್ಪೇನ್‌ನಲ್ಲಿ ಸ್ಪ್ಯಾನಿಷ್ ಮೂನ್ ಪತಂಗ ಎನ್ನುತ್ತಾರೆ. ಅಟ್ಲಾಸ್ ಚಿಟ್ಟೆ 24 ಸೆಂ.ಮೀ ಉದ್ದದ ರೆಕ್ಕೆಗಳನ್ನು ಹೊಂದಿರುತ್ತದೆ. ಭಾರತದಲ್ಲಿ ಇದರ ಉದ್ದ 12 ರಿಂದ 17 ಸೆಂ.ಮೀ. ಮಾತ್ರ ಇರುತ್ತದೆ.
"ಇದು ಅಪರೂಪದ ಜಾತಿಯ ಕೀಟವಾಗಿದೆ. ಇದು ಮೊದಲು ಜಾರ್ಖಂಡ್‌ನ ಪಲಮುದಲ್ಲಿ ಕಂಡು ಬಂದಿತ್ತು. ಇದನ್ನು ಅಟ್ಲಾಸ್ ಚಿಟ್ಟೆ ಎಂದು ಕರೆಯಲಾಗುತ್ತದೆ. ಇದರ ವೈಜ್ಞಾನಿಕ ಹೆಸರು ಅಟ್ಟಾಕಸ್ ಅಟ್ಲಾಸ್. ಇದು ಪ್ರಪಂಚದಲ್ಲಿ ಕಂಡು ಬರುವ ಪತಂಗಗಳಲ್ಲಿಯೇ ದೊಡ್ಡದಾಗಿದೆ" ಎಂದು ವನ್ಯಜೀವಿ ಟ್ರಸ್ಟ್ ಆಫ್ ಇಂಡಿಯಾದ ಅಧಿಕಾರಿ ಸುಬ್ರತಾ ಬೆಹೆರಾ ಮಾಹಿತಿ ನೀಡಿದರು.
ಓದಿ: ಸಾವಿರಾರು ಕೋಟಿ ಒಡೆಯ, ಹತ್ತಾರು ಟನ್ ಚಿನ್ನದ ಮಾಲೀಕ.. ತಿರುಪತಿ ತಿಮ್ಮಪ್ಪನ ಆಸ್ತಿ ಬಹಿರಂಗ
