અમદાવાદઃ આ વર્ષે ફેબ્રુઆરી મહિનાથી ઉનાળાએ અણધારી હાઉકલી કરી દીધી છે. સૂર્ય દેવતા દિવસે દિવસે આકરો મિજાજ દેખાડી રહ્યા છે. હવામાન ખાતા તરફથી એવી આગાહી કરવામાં આવી છે કે, આ વખતે વધારે ગરમી પડવાની છે. જોકે, ઉનાળો વહેલો શરૂ થઈ જતા ફેબ્રુઆરી મહિનામાં ભૂજમાં આકરી ગરમીનો અહેસાસ થયો છે. મંગળવારના એક રીપોર્ટ અનુસાર રાજ્યના આઠ નગરમાં મહત્તમ તાપમાનનો પારો 36 ડિગ્રીને પાર થઈ ગયો હતો.
આ પણ વાંચો Gujarat Weather Today : પાછલા 30 વર્ષના ઇતિહાસને પાછળ છોડતી આજની ગરમી
ભૂજ સૌથી ગરમઃ મંગળવારે (તા.28 ફેબ્રુઆરી) 38.7 ડિગ્રી તાપમાન સાથે ભૂજ રાજ્યનું સૌથી ગરમ શહેર રહ્યું હતું. મહારાષ્ટ્રમાંથી વિદર્ભ, ગુજરાતમાંથી સૌરાષ્ટ્ર-કચ્છ તેમજ દક્ષિણ ગુજરાતમાંથી ગરમીની શરૂઆત થઈ શકે છે. જેની અસર બાકીના વિસ્તારોમાં વર્તાશે. માર્ચ મહિનામાં જ 40 ડિગ્રીથી વધારે તાપમાન રહેવાની સંભાવના છે. જોકે, ભૂજમાં અગાઉ ફેબ્રુઆરી મહિનામાં આટલી ગરમી ક્યારેય પડી ન હતી. મંગળવારથી 48 કલાક સુધીમાં તાપમાનમાં ખાસ કોઈ મોટા ફેરફાર થવાની શક્યતાઓ નથી. પરંતુ, શુક્રવાર પછીના ત્રણથી ચાર દિવસમાં તાપમાનમાંથી 2થી 3 ડિગ્રી તાપમાન વધશે.
આ પણ વાંચો Climate of Gujarat: રાજ્યમાં ડબલ ઋતુ, સવારે ટાઢક અને બપોરે આકરો તાપ
ગરમી વધશેઃ રાજ્યમાં કાળઝાળ ગરમી પડવાની શક્યતાઓ ખાનગી સંસ્થા સ્કાયમેટ અને હવામાન ખાતાએ વ્યક્ત કરી છે. બંગાળની ખાડીમાં સર્જાયેલા લો પ્રેશરને કારણે માર્ચ મહિનાના પહેલા અઠવાડિયામાં ગુજરાતના કેટલાક વિસ્તારોમાં માવઠું પડવાની સંભાવના છે. આ પ્રકારની આગાહીથી ખેડૂતો એકાએક ચિંતામાં મૂકાઈ ગયા છે. હવે જો માવઠું પડશે તો કેરીનો પાક બગડવાની પણ ભીતિ સેવાઈ રહી છે.
અમદાવાદમાં અસર શરૂઃ અમદાવાદમાં સામાન્ય રીતે માર્ચ મહિનાથી તાપ શરૂ થાય છે. પણ આ વખતે ફેબ્રુઆરી મહિનામાં સામાન્ય કરતા ચાર ડિગ્રી તાપમાન વધારે નોંધાયું હતું. આગામી અઠવાડિયામાં અમદાવાદમાં 38થી 40 જેટલું તાપમાન થઈ શકે છે. મંગળવારથી પાંચ દિવસ દરમિયાન લઘુતમ તાપમાન 17 ડિગ્રીની આસપાસ રહેવાની પૂરી શક્યતાઓ છે. જોકે, સતત બદલી રહેલા હવામાનને કારણે શરદી-ઉઘરસના કેસ પણ વધી રહ્યા છે. સવારે ઠંડી અને આખો દિવસ ગરમી એવી ડબલ સીઝનથી વાયરલ ઈન્ફેક્શનના કેસમાં પણ રાતોરાત વધારો થઈ રહ્યો છે.
