প্ৰাক্তন মন্ত্ৰী ছিদ্দিক আহমেদৰ ভাতৃৰ গাড়ীত ওলাল আধা কিলো হেৰ’ইন

প্ৰাক্তন মন্ত্ৰী তথা বৰ্তমান কংগ্ৰেছৰ নিলম্বিত বিধায়ক ছিদ্দিক আহমেদৰ(Congress MLA Siddique Ahmed) সম্পৰ্কীয় ভাতৃ আফতাৰ হুছেইনক বৃহস্পতিবাৰে আৰক্ষীয়ে কেইবা কোটি টকা মূল্যৰ হেৰ’ইনসহ আটক কৰে । কৰিমগঞ্জ আৰক্ষীয়ে ML 04 B 5065 নম্বৰৰ বলেৰো বাহনৰ পৰা প্ৰায় 500 গ্ৰাম সন্দেহজনক হেৰ’ইনসহ আটক কৰে দক্ষিণ কৰিমগঞ্জ সমষ্টিৰ বিধায়কগৰাকীৰ ভাতৃক । আফতাৰ হুছেইন ছিদ্দিক আহমেদৰ খুৰাক তথা ধলছৰা পঞ্চায়তৰ প্ৰাক্তন সভাপতি আব্দুৰ শুকুৰৰ পুত্ৰ । আৰক্ষীয়ে বলেৰো বাহনখনৰ তেলৰ টেংকি আৰু আন অংশৰ পৰা আৰক্ষীৰ দলটোৱে উদ্ধাৰ কৰে হেৰ’ইনখিনি(Heroin seized in Karimganj ) । কৰিমগঞ্জৰ আৰক্ষী অধীক্ষক পদ্মনাভ বৰুৱাৰ নেতৃত্বত বাৰইগ্ৰাম পেচাৰপাৰ পথৰ কাঠালগুল এলেকাত আৰক্ষীয়ে চলোৱা অভিযানৰ সময়ত জব্দ হয় হেৰ’ইনখিনি । আৰক্ষী সূত্ৰে জানিব পৰা মতে, জব্দকৃত হেৰ’ইনখিনিৰ মূল্য তিনি পৰা চাৰি কোটি টকা হ’ব ৷