ওদালগুৰি,27ছেপ্টেম্বৰঃ বিতৰ্কই লগ নেৰা হৈছে অসম আৰক্ষীক । এইবাৰ নিলম্বিত হ'ল ওদালগুৰিৰ অন্তৰ্গত মাজবাট থানাৰ অ'চি উপেন চন্দ্ৰ বৰ্মন । উল্লেখ্য যে অ'চি উপেন চন্দ্ৰ বৰ্মনৰ বিৰুদ্ধে উত্থাপন হৈছিল অপৰাধীক ৰক্ষণাবেক্ষণ দিয়াৰ অভিযোগ ।
অভিযোগ অনুসৰি যোৱা চাৰি ছেপ্তেম্বৰৰ নিশা গনেশ পূজা উপলক্ষ্যে লামাবাৰীত আয়োজিত সাংস্কৃতিক অনুষ্ঠান উপভোগ কৰিবলৈ গৈছিল এগৰাকী কিশোৰী । নিশা প্ৰায় ডেৰ বজাত অনুষ্ঠান উপভোগ কৰি প্ৰতিবেশী ভগ্নীৰ লগত উভতি আহিছিল কিশোৰী গৰাকী । কিন্তু উভতাৰ পথতে বাবলা দৈমাৰী নামৰ যুৱকজনে কিশোৰী গৰাকীক ধৰ্ষণ কৰে ৷ পিছদিনা এই ঘটনা সন্দৰ্ভত যুৱতীৰ পৰিয়ালে মাজবাট থানাত এজাহাৰ দাখিল কৰে । কিন্তু আচৰ্যজনক ভাৱে ভাৰপ্ৰাপ্ত আৰক্ষী বিষয়া উপেন চন্দ্ৰ বৰ্মনে গোচৰ ৰুজু কৰাৰ বিপৰীতে জোৰ কৰি এয়া ধৰ্ষণ নহয় বুলি ৪০ হাজাৰ টকা ভুক্তভোগী যুৱতীগৰাকীক দিয়াৰহে অভিযোগ কৰে ভুক্তভোগী পৰিয়ালে । এই কথাত বৃদ্ধ পিতৃ আৰু ভুক্তভোগী যুৱতীগৰাকী অসন্তুষ্ট হয় । যাৰ পাচত মানসিকভাবে ভাগি পৰি যুৱতীগৰাকীয়ে 7 ছেপ্টেম্বৰত কলংকৰ বোজা সহিব নোৱাৰি আত্মহননৰ পথ বাচি লয় ।
আনহাতে গোচৰটো উঠাই লবলৈ হেচা দিয়া, ভুক্তভোগীৰ এজাহাৰ পঞ্জীয়ন নকৰা আদি অভিযোগ শেহতীয়াকৈ উত্থাপন হোৱাৰ পিছতে শুকুৰবাৰে ওদালগুৰি আৰক্ষীয়ে নিলম্বত কৰে অ'চি উপেন চন্দ্ৰ বৰ্মনক । ইপিনে ধৰ্ষণত অভিযুক্ত বাবলা দৈমাৰী কিশোৰী গৰাকীয়ে আত্মহত্যা কৰাৰ পিছৰে পৰা পলাতক হৈ আছিল যদিও শুকুৰবাৰে আৰক্ষীয়ে আটক কৰে ।