ৰঙাপাৰা,২৪ মে': চুবুৰীয়া ৰাজ্য অৰুণাচল প্ৰদেশৰ পৰা বৈ অহা মানশিৰি নৈখনে তীব্ৰ গৰাখহনীয়া সৃষ্টি কৰি আহিছে । নৈখনৰ বুকুত জাহ যোৱাৰ উপক্ৰম ঘটিছে এখন চৰকাৰী বিদ্যালয়(Government Schools towards destruction in erosion) । যিকোনো সময়ত নৈখনৰ বুকুত জাহ যাব দপদপী-ৰংপুৰ প্ৰাথমিক বিদ্যালয়খন ।
১৯৭৮ চনত চতিয়া সমষ্টিৰ অন্তৰ্গত দপদপী-ৰংপুৰ গাঁৱত এক শৈক্ষিক পৰিবেশ গঢ়ি তোলাৰ উদ্দেশ্যৰে দপদপী-ৰংপুৰত এখন বড়ো মাধ্যমৰ বিদ্যালয় স্থাপন কৰা হৈছিল ৷ সম্প্ৰতি বিদ্যলয়খনলৈ ভাবুকি কঢ়িয়াই আনিছে কাষেৰে বৈ যোৱা মানশিৰি নৈখনে ৷
নেৰানেপেৰা বৰষুণৰ ফলত ফেনে-ফুটুকাৰে বাঢ়ি অহা বাঢ়নি পানীয়ে তীব্ৰ গৰাখহনীয়াৰ সৃষ্টি কৰি অহাৰ ফলত বিদ্যালয়খনলৈ চৰম ভাবুকি কঢ়িয়াই অনিছে ৷ ইতিমধ্যে বিদ্যালয়খনৰ ১ বিঘা ভুমি নৈখনৰ বুকুত জাহ গৈছে ৷ বিদ্যালয়খনৰ পৰা মাত্ৰ ২০ মিটাৰ দূৰত্বত বৈ আছে মানশিৰি নৈ ।
যিকোনো সময়ত নৈখনৰ বুকুত জাহ যাব বিদ্যালয়খন । ক্ৰমান্বয়ে সুঁতি সলনি কৰা নৈখনৰ বুকুত জাহ গৈছে কৃষক ৰাইজৰ শ শ বিঘা কৃষিভূমি । যদিহে চৰকাৰে অতিশীঘ্ৰে নৈখনৰ খহনীয়া প্ৰতিৰোধৰ বাবে কোনো ব্যৱস্থা গ্ৰহণ নকৰে, তেতিয়াহ’লে অনাগত দিনত বিদ্যালয়খন নিঃশেষ হৈ যোৱাটো নিশ্চিত বুলি উল্লেখ কৰিলে অঞ্চলবাসীয়ে ।
লগতে পঢ়ক: কাজিৰঙাৰ বন্য জীৱবোৰক সুৰক্ষা দিয়াৰ অৰ্থে ৰাজপথত নামিছে নগাঁও পৰিবহন বিভাগ
