ৰঙাপৰা,2 জুলাই: জন প্ৰতিনিধি থকা স্বত্বেও ৰাইজে গাঁঠিৰ ধন ভাঙি নিৰ্মাণ কৰে এখন বাঁহৰ দলং ৷ ৰাইজে নখ জোকাৰিলে নৈ বয় বোলা কথাষাৰ পুনৰবাৰ প্ৰতিপন্ন কৰে মিছামাৰীৰ ননকে বেলশিৰি গাঁৱৰ ৰাইজে । বিগত প্ৰায় তিনি মাহে ৰাইজৰ শ্ৰমদানেৰে গাঁৱবাসীয়ে বেলশিৰি নদীৰ ৰেল দলঙৰ সমীপত মাংগলিক অনুষ্ঠানৰ মাজেৰে উদ্বোধন কৰে দলঙখন ৷ প্ৰায় 75 হাজাৰ টকা ব্যয় সাপেক্ষে নিৰ্মাণ কৰি উলিওৱা বাঁহৰ দলঙখন মুকলি কৰে সমাজসেৱক শৈলেন্দ্ৰ নাৰ্জাৰীয়ে ৷
দেশৰ স্বাধীনতা লাভৰ প্ৰায় 73 বছৰ অতিক্ৰমৰ পিছতো ৰাইজৰ যাতায়াতৰ উপযোগীকৈ বেলশিৰি নদীৰ ওপৰত এখনো পকী দলং নিৰ্মাণ নোহোৱাত প্ৰায় বিশখনৰো অধিক গাঁৱৰ ৰাইজে ভোগ কৰি আহিছিল যমৰ যাতনা ৷ ধনখনা উচ্চ মাধ্যমিক বিদ্যালয়ৰ শিক্ষক অজিত তালুকদাৰ, সমাজকৰ্মী ভিক্টৰ নাৰ্জাৰী আৰু শিৱ কিষাণৰ নেতৃত্বত নিৰ্মাণ হোৱা দলঙখনৰ জৰিয়তে ৰাইজে যাতায়াতৰ ক্ষেত্ৰত বহুগুণে উপকৃত হ’ব ৷ উক্ত বাঁহৰ দলঙৰ সমীপত ৰে’লৱে বিভাগৰ এখন লোহাৰ দলং আছে । ৰঙিয়া-ৰঙাপৰা সংযোগী ব্ৰডগজ ৰে’লপথৰ দলঙখনেৰে ৰাইজে দীৰ্ঘদিনে যাতায়াত কৰাত অসাৱধানবশতঃ ৰে’লৰ খুন্দাত এতিয়ালৈকে প্ৰায় ১৫ জন লোকৰ মৃত্যু ঘটিছে । কিন্তু অঞ্চলবাসীৰ এটা দীৰ্ঘদিনীয়া সমস্যা সমাধানৰ ক্ষেত্ৰত জন প্ৰতিনিধিসকলে কোনো গুৰুত্ব আৰোপ নকৰাৰ অভিযোগ উত্থাপিত হৈছে ।
লগতে চাওকঃ চিৰাঙত আই নদীৰ গৰাখহনীয়াৰ ভয়াৱহ ৰূপ
