শিৱসাগৰ, 7 ফেব্ৰুৱাৰীঃ ক্ৰীড়াবিদ অৰ্জুন ভোগেশ্বৰ বৰুৱালৈ অসম চৰকাৰৰ 2019 বৰ্ষৰ বীৰ চিলাৰায় বঁটা ৷ অহা 9 ফেব্ৰুৱাৰীত বঙাইগাঁৱত আয়োজিত হ’বলগীয়া বীৰ চিলাৰায় দিৱসৰ অনুষ্ঠানত মুখ্যমন্ত্ৰী সৰ্বানন্দ সোণোৱালে প্ৰদান কৰিব এই বঁটা ৷
উল্লেখ্য যে এগৰাকী ফুটবল খেলুৱৈৰূপে নিজৰ ক্ৰীড়া জীৱন আৰম্ভ কৰা ভোগেশ্বৰ বৰুৱাই ভাৰতীয় প্ৰতিৰক্ষা বাহিনীৰ EME বিভাগত যোগদান কৰাৰ পিচতে নিজকে ক্ৰীড়া ক্ষেত্ৰত এক ৰণুৱা হিচাপে প্ৰতিষ্ঠা কৰিবলৈ সক্ষম হৈছিল ৷ ভোগেশ্বৰ বৰুৱাক 1967 চনত অৰ্জুন পুৰষ্কাৰেৰে সন্মানিত কৰা হয় ৷ উল্লেখ্য যে, অৰ্জুন পুৰষ্কাৰ লাভ কৰা উত্তৰ-পূৱৰ প্ৰথমগৰাকী ক্ৰীড়াবিদ অৰ্জুন ভোগেশ্বৰ বৰুৱা ৷ আনহাতে এই সফল ক্ৰীড়াবিদগৰাকীৰ জন্মদিন 3 চেপ্তেম্বৰৰ দিনটো সমগ্ৰ অসমত অভিৰুচি ক্ৰীড়া দিৱস হিচাপে পালন কৰি অহা হৈছে ৷ অসম চৰকাৰৰ 2019 বৰ্ষৰ বীৰ চিলাৰায় বঁটা লাভ কৰাৰ বাবে অৰ্জুন ভোগেশ্বৰ বৰুৱাক শুভেচ্ছা জনাইছে ৰাজ্যৰ ক্ৰীড়াপ্ৰেমীসকলে ৷
