নলবাৰী, ২২ ছেপ্টেম্বৰ : অসম জাতীয়তাবাদী যুৱ ছাত্ৰ পৰিষদৰ কেন্দ্ৰীয় সমিতিৰ নেতা-কৰ্মীক লখিমপুৰৰ গোগামুখৰ প্ৰতিবাদস্থলীৰ পৰা আৰক্ষীয়ে আটক কৰাৰ পিছতে ৰাজ্যৰ ভিন্ন প্ৰান্তত সংগঠনটোৰ সদস্যসকলে প্ৰতিবাদী কাৰ্যসূচী ৰূপায়ণ কৰিছে । মঙলবাৰে সন্ধিয়া নলবাৰীতো সংগঠনটোৰ জিলা সমিতিৰ নেতা-কৰ্মীয়ে প্ৰতিবাদ সাব্যস্ত কৰে ।
নলবাৰীৰ বৰভাগত সংগঠনটোৰ কৰ্মকৰ্তাসকলে মুখ্যমন্ত্ৰী ড৹ হিমন্ত বিশ্ব শৰ্মাৰ প্ৰতিকৃতি দাহ কৰে । লগতে আৰক্ষীয়ে আটক কৰা কেন্দ্ৰীয় সমিতিৰ নেতা-কৰ্মীসকলক বিনাচৰ্তে মুকলি কৰি দিয়াৰ দাবী জনায় । সোৱণশিৰি জলবিদ্যুৎ প্ৰকল্পৰ বিৰোধিতাৰে মঙলবাৰে অসম জাতীয়তাবাদী যুৱ ছাত্ৰ পৰিষদৰ কেন্দ্ৰীয় সমিতিয়ে গোগামুখত সৰ্বাত্মক প্ৰতিবাদী কাৰ্যসূচী ৰূপায়ণ কৰিছিল ।
সেই সময়তে প্ৰতিবাদস্থলীত আৰক্ষী উপস্থিত হৈ সংগঠনটোৰ কেন্দ্ৰীয় সমিতিৰ সভাপতি ৰাণাপ্ৰতাপ বৰুৱা, সাধাৰণ সম্পাদক পলাশ চাংমাইসহ কেইবাগৰাকীও নেতা-কৰ্মীক আটক কৰে । আৰক্ষীৰ এই দমন নীতিৰ বিৰুদ্ধে ক্ষুব্ধ হৈ পৰে সংগঠনটো । সেয়ে মঙলবাৰৰ দিনটোত ৰাজ্যৰ বিভিন্ন প্ৰান্তত জিলা আৰু আঞ্চলিক সমিতিসমূহে প্ৰতিবাদী কাৰ্যসূচী গ্ৰহণ কৰে ।
নলবাৰীত সংগঠনটোৰ কেন্দ্ৰীয় সমিতিৰ উপ-সভাপতি বিশ্বজিত বৰুৱা, নলবাৰী জিলা সমিতিৰ সাধাৰণ সম্পাদক কৌশিক বৰ্মনৰ নেতৃত্বত প্ৰায় অৰ্ধ শতাধিক কাৰ্মকৰ্তাই মুখ্যমন্ত্ৰীৰ প্ৰতিকৃতি দাহ কৰে । অসম জাতীয়তাবাদী যুৱ ছাত্ৰ পৰিষদৰ কেন্দ্ৰীয় সমিতিৰ নেতৃত্বক আৰক্ষীয়ে শীঘ্ৰে মুকলি কৰি নিদিলে তীব্ৰ গণতান্ত্ৰিক আন্দোলন গঢ়ি তুলিবলৈ বাধ্য হ'ব বুলি সংগঠনটোৰ নলবাৰী জিলা সমিতিৰ সভাপতি পাৰ্থপ্ৰতীম শৰ্মাই হুংকাৰ দিয়ে ।
লগতে পঢ়ক: অশ্লীল মন্তব্য কৰি শিক্ষানুষ্ঠানৰ পৰা বহিষ্কাৰ হ’ল বিমান