নলবাৰী,28ফেব্ৰুৱাৰী: যি পানীত জাহাজ চলে তাত পদুম ফুলিব নোৱাৰে ৷ অসমত অত্যাচাৰৰ উৎপাতত চাৰিওফালে অসম ডুবাৰ উপক্ৰম হৈছে ৷ ৰাজহুৱা সম্পত্তি বিক্ৰী কৰি অসমক ডুবাবৰ বাৱে উঠিপৰি লাগিছে বিজেপিয়ে ৷ কিন্তু অসমক উদ্ধাৰ কৰাৰ বাবে জাহাজ আহিছে ৷ জাহাজৰ জৰিয়তে অসমক উদ্ধাৰ কৰা হ'ব ৷ দেওবাৰে এই মন্তব্য কৰে অসম জাতীয় পৰিষদৰ সভাপতি লুৰিণ জ্যোতি গগৈয়ে ৷
নলবাৰীৰ সোণকুৰিহাত অনুষ্ঠিত আঞ্চলিক ৰাজনৈতিক দল অসম জাতীয় পৰিষদৰ বিশাল জনজাগৰণ সভাত বিজেপি দলক ক্ষুৰধাৰ সমালোচনা কৰি গগৈয়ে কয় যে, পদুমে অসমক বোকাময় কৰি পেলাইছে জাত পাতৰ ৰাজনীতিৰে ৷ এইবাৰ অসমত কেৱল জাতীয়বাদৰ নিচান উৰিব ৷ তদুপৰি কিমান অগণতান্ত্ৰিক হ'লে মুছলমানৰ ভোট নালাগে বুলি প্ৰশ্ন কৰে গগৈয়ে ৷ আনহাতে, বিজেপিয়ে ধন দি পিছফালৰে কেঁচিৰে কাটি নিয়ে বুলি কটাক্ষ কৰে অসম জাতীয় পৰিষদৰ সভাপতি লুৰিণ জ্যোতি গগৈয়ে ৷ উল্লেখ্য যে, সভাত অংশগ্ৰহণ কৰে অসম জাতীয় পৰিষদৰ নেতা পবিন্দ্ৰ ডেকা, দুলু আহমেদ আৰু নগেন ডেকাই ৷
লগতে পঢ়কঃ চামগুৰিত ৰকিবুল হুছেইনৰ নিৰ্বাচনী কুচকাৱাজ
