নগাঁও, 27 জুন : নিশা ৰাষ্ট্ৰীয় ঘাইপথৰ কাষৰ ধাবাত সুৰাপান কৰি গাড়ী চলোৱাসকল এতিয়াৰ পৰা সাৱধান ! অন্তত নগাঁৱৰ কোনো ধাবাত এতিয়াৰ পৰা পান কৰিব নোৱাৰিব সুৰা । নগাঁৱৰ কোনো ধাবাত অবৈধভাৱে বিক্ৰী কৰিব নোৱাৰিব সুৰা । সঘনাই বৃদ্ধি পোৱা পথ দুৰ্ঘটনা ৰোধ কৰাৰ ক্ষেত্ৰত কঠোৰ হৈছে নগাঁৱৰ আৰক্ষী অধীক্ষক নৱনীত মহন্তই ।
বিশেষকৈ ৰাষ্ট্ৰীয় ঘাইপথ অথবা ৰাজ্যিক ঘাইপথৰ কাষত থকা ধাবাৰ পৰাই সুৰাপান কৰি নিশা বাহন চলোৱাৰ ফলত প্ৰায়েই সংঘটিত হয় পথ দুৰ্ঘটনা । কিন্তু নগাঁৱত এতিয়াৰ পৰা পথৰ কাষৰ ধাবাত অবৈধভাৱে বিক্ৰী কৰিব নোৱাৰিব সুৰা । কাৰণ এইক্ষেত্ৰত কঠোৰ পদক্ষেপ গ্ৰহণ কৰিছে নগাঁৱৰ আৰক্ষী অধীক্ষক নৱনীত মহন্তই ।
নগাঁৱৰ পথৰ কাষত থকা একাধিক ধাবাত অবৈধভাৱে সুৰা বিক্ৰী কৰাৰ উপৰিও ধাবাৰ ভিতৰতে অনৈতিক কাৰ্যকলাপ সংঘটিত হোৱাৰো অভিযোগ উত্থাপন হৈ আহিছে । এই ধাবাসমূহত অবৈধভাৱে সুৰা বিক্ৰী বন্ধ কৰিবলৈ তৎপৰ হৈ পৰিছে নগাঁও আৰক্ষী ।
লগতে পঢ়ক : Cyber crime : মৰিগাঁৱত চাইবাৰ অপৰাধীৰ বিৰুদ্ধে অভিযান; গ্ৰেপ্তাৰ ছীম কাৰ্ড ব্যৱসায়ী
সোমবাৰে ওৰে নিশা ঘাইপথৰ কাষৰ ধাবাত নগাঁৱৰ বিভিন্ন আৰক্ষী থানাৰ আৰক্ষীয়ে চলায় অভিযান । নগাঁৱৰ আৰক্ষী অধীক্ষক নৱনীত মহন্তৰ নিৰ্দেশত জিলাখনৰ বিভিন্ন আৰক্ষী থানাৰ আৰক্ষীয়ে অভিযান চলাই বুজন পৰিমাণৰ বিলাতী সুৰা জব্দ কৰিবলৈ সক্ষম হয় ।
লগতে নিশা গোপনে সুৰা বিক্ৰী কৰা ধাবাসমূহকো পৰবৰ্তী সময়ত সুৰা বিক্ৰী বন্ধ ৰাখিবলৈ কঠোৰ সকীয়নী দিয়ে আৰক্ষী অধীক্ষক নৱনীত মহন্তই । পথৰ কাষৰ ধাবাসমূহত সুৰা বিক্ৰী বন্ধ হ’লে পথ দুৰ্ঘটনা বহু পৰিমানে হ্ৰাস পাব বুলি আশাবাদী নগাঁৱৰ আৰক্ষী অধীক্ষক নৱনীত মহন্ত ।
উল্লেখযোগ্য যে, পথ সুৰক্ষাৰ বাবে নগাঁৱৰ আৰক্ষী অধীক্ষক নৱনীত মহন্তই গ্ৰহণ কৰা পদক্ষেপক প্ৰশংসা কৰিছে নগাঁৱৰ বিভিন্ন মহলে ।
লগতে পঢ়ক : Firing in Nagaon: নগাঁৱত দুৰ্বৃত্তৰ গুলীত আহত ঔষধ বিপণিৰ স্বত্বাধিকাৰী; আটক অভিযুক্ত
