লখিমপুৰ,১৩ মে': যত্ন কৰিলে ৰত্ন পায় । অসমীয়া সমাজৰ এই আপ্তবাক্যশাৰী আখৰে আখৰে সঁচা বুলি প্ৰমাণ কৰি দেখুৱালে লখিমপুৰৰ বিমান দাস নামৰ পিতৃহাৰা যুৱক জনে । ঘুগুনি পকৰি বেছি ঘৰ চলোৱা পিতৃহাৰা বিমানে পালে অসম আৰক্ষীৰ কনিষ্টবলৰ চাকৰি(Biman Das appointed in constable) ।
লখিমপুৰৰ বছাগাৱৰ বিমান দাসে ঘুগুনি পকৰি বেছি পঢ়াৰ খৰচ উলিওৱাৰ লগতে মাতৃসহ ভগ্নীক পোহপাল দিছিল । পঢ়া,ব্যৱসায়, ঘৰ চলোৱা আদিৰ সমানে বিমানে চলাই গৈছিল চাকৰিৰ বাবে শাৰিৰীক অনুশীলন । এই ক্ষেত্রত মাতৃয়েও দিছিল সাহস আৰু প্ৰেৰণা । আত্মবিশ্বাস, কষ্টৰ বলতে অৱশেষত বিমানে পালে কনিষ্টবলৰ চাকৰি । বৃহস্পতিবাৰে অসম আৰক্ষী কণিষ্টবল পদৰ ফলাফল ঘোষণা পিছতেই আনন্দ বন্যা বলিছে বিমান দাসৰ ঘৰত (Ray of hope in many homes) ।
উল্লেখ্য দশমান শ্ৰেণীতেই পিতৃৰ বিয়োগ হোৱাত মাক, বায়েক আৰু ভনীয়েকৰ ভৰণপোষণৰ দায়িত্ব পৰিছিল বিমানৰ ওপৰত । পথৰ কাষত ঘুগুনি পকৰি বেছি পঢ়াৰ খৰচ উলিওৱাৰ লগতে বিধবা মাতৃ, বাই-ভনীৰে ভৰা ঘৰখন চলাবলগীয়া হৈছিল বিমানে ।
ইফালে জীৱিকা অৰ্জন, পঢ়া, চাকৰিৰ বাবে শাৰিৰীক অনুশীলন আদি সমানে চলাইছিল বিমানে । আন দহজন যুৱকৰ দৰে আড্ডা মাৰি ঘুৰি ফুৰিবলৈ সময় নাছিল বিমানৰ । প্ৰবল আত্মবিশ্বাস আৰু কষ্ট কৰি লক্ষ্যৰ দিশে আগবঢ়া বিমানৰ লক্ষ্য পুৰণ হল । মাতৃয়ে টুকিলে আনন্দৰ চকুলো । আনন্দত আত্মহাৰা হল গাঁওখনৰ ৰাইজ ।
ফলাফল ঘোষণাৰ পিছতেই লখিমপুৰ জিলাৰ বছাগাঁৱৰ বিমানৰ পৰিয়ালটোৰ লগতে গাঁৱৰ ৰাইজ উৎফুল্লিত হৈ পৰিছে । নিকাভাৱে নিযুক্তি লাভ কৰাত পৰিয়ালৰ লোকৰ লগতে গাৱঁৰ ৰাইজ উৎফুল্লিত হৈ পৰাৰ লগতে ৰাজ্য চৰকাৰক ধন্যবাদ জ্ঞাপন কৰিছে ৷ উল্লেখ্য যে বিমান দাসৰ লগতে গাওঁখনৰ আৰু পাঁচজন যুৱকে কনিষ্টবলৰ পদত নিযুক্তি লাভ কৰিছে ।
লগতে পঢ়ক: নিৰ্মাণ হ'ব নে তেজপুৰৰ মিছন চাৰিআলিৰ উৰণীয়া সেঁতু ?
