লখিমপুৰ, 28 নৱেম্বৰ: "সৰ্বানন্দ সোণোৱালক আমি পিতৃ জ্ঞান কৰিছিলো কিন্তু আমাৰ কথা চিন্তা কৰিবলৈ আহৰি নাই মুখ্যমন্ত্ৰীৰ,সেয়ে আজি তেওঁৰ মৃত্যু হোৱা বুলি ধৰি লৈ আমি মুণ্ডন কৰিলো ৷ "
এক ব্যতিক্ৰমী পন্থা হাতত লৈ শাসনাধিষ্ঠিত চৰকাৰৰ বিৰুদ্ধে প্ৰতিবাদ সাব্যস্ত কৰে অসম জাতীয়তাবাদী যুৱ পৰিষদে ৷ নামনি সোৱণশিৰী জলবিদ্যুৎ প্ৰকল্পৰ কাম বন্ধ কৰাৰ দাবীত বৃহস্পতিবাৰৰ পৰা ৫ দিনীয়া প্ৰতিবাদী কাৰ্যসূচী গ্ৰহণ কৰে সংগঠনটোৱে ৷
লগতে পঢ়ক: এইবাৰ তিনিচুকীয়াত উৰিল আলফাৰ পতাকা
লখিমপুৰৰ ৰাজপথত বৃহস্পতিবাৰে দিনৰ ভাগত ডবা,শংখ বজাই সংগঠনটোৰ চাৰি সদস্যই মুণ্ডন কৰে। এই প্ৰতিবাদী কাৰ্যসূচীত বিভিন্ন দল সংগঠনৰ জেষ্ঠ সদস্য সকলেও অংশগ্ৰহণ কৰে ৷ ভাৰত চৰকাৰে শীঘ্ৰে নামনি সোৱণশিৰি জলবিদ্যুৎ প্ৰকল্পৰ কাম বন্ধ কৰক অন্যথা পৰৱৰ্তী সময়ত পৰিস্থিতি অধিক ভয়াৱহ হ'ব বুলি হুংকাৰ দিয়ে প্ৰতিবাদকাৰীয়ে।
