তিনিচুকীয়া, 21 মে’: সত্ৰ নগৰীলৈ পৰিণত হ’ল তৈলনগৰী ডিগবৈৰ মুলিয়াবাৰী খেলপথাৰ ৷ তিনিচুকীয়া জিলাৰ তৈল নগৰী ডিগবৈৰ মুলিয়াবাৰী খেলপথাৰত প্ৰথমবাৰৰ বাবে অনুষ্ঠিত কৰা হৈছে শ্ৰী শ্ৰী বদলা পদ্ম আতা পুৰুষৰ 478 সংখ্যক আবিৰ্ভাৱ মহোৎসৱ আৰু সাংস্কৃতিক সমাৰোহ ৷ সোমবাৰে এই সমাৰোহৰ অন্তিমটো দিনত উপস্থিত হয় এই সমাৰোহৰ সভাপতি তথা কেন্দ্ৰীয় মন্ত্ৰী, অসমৰ প্ৰাক্তন মুখ্যমন্ত্ৰী সৰ্বানন্দ সোণোৱাল । তিনিদিনীয়া কাৰ্যসূচীৰে আৰম্ভ কৰা হৈছিল এই আবিৰ্ভাৱ মহোৎসৱ আৰু সাংস্কৃতিক সমাৰোহ ৷
এই সাংস্কৃতিক সমাৰোহৰ সভাপতি হিচাপে উপস্থিত হৈ অস্থায়ী কীৰ্তন ঘৰত কেন্দ্ৰীয় মন্ত্ৰীগৰাকীয়ে সেৱা কৰাৰ লগতে ধৰ্মীয় প্ৰাণ ৰাইজক ধন্যবাদ জ্ঞাপন কৰি গুৰুজনাৰ স্মৃতিক প্ৰণিপাত জনায় । তেওঁ কয় যে সাংস্কৃতিক বাতাবৰণ বৰ্তাই ৰাখি আমি অসমখনক সমন্বয়ৰ সেতুৰে বান্ধিব লাগে ৷
লগতে অন্তিমটো দিনত বিভিন্ন জাতি-জনগোষ্ঠী সমন্বিত শোভাযাত্ৰা মুকলি কৰে অসম বিধানসভাৰ অধ্যক্ষ বিশ্বজিৎ দৈমাৰীয়ে । তেওঁৰ লগত সহযোগ কৰে কেন্দ্ৰীয় মন্ত্ৰী ৰামেশ্বৰ তেলী, ডিগবৈ সমষ্টিৰ বিধায়ক সুৰেণ ফুকনৰ লগতে কেইবাগৰাকীও বিশিষ্ট ব্যক্তিয়ে ৷ এই শোভাযাত্ৰাত হাজাৰ হাজাৰ ধৰ্মীয়প্ৰাণ ৰাইজৰ লগতে ভিন্ন জাতি-জনগোষ্ঠীৰ শিল্পীসকলে অংশগ্ৰহণ কৰে ৷
এই শোভাযাত্ৰাত উপস্থিত থাকি অধ্যক্ষগৰাকীয়ে নিজকে বহু সুখী বুলি সাংবাদিকৰ সন্মুখত মন্তব্য প্ৰকাশ কৰে ৷ তেওঁ কয়, ‘‘তৈলনগৰী অসমৰ এক পৰিচয় ৷ অসম প্ৰাকৃতিক তেলৰ বাবে জনাজাত ৷ এই অনুষ্ঠানত প্ৰত্যেক জাতি-জনগোষ্ঠীয়ে নিজৰ কলা-সংস্কৃতি দেখুৱাবলৈ পাৰিছে ৷ মই সকলোকে লগ পাই নথৈ আনন্দিত হৈছে ৷ এয়া আধ্যাত্মিক আৰু সাংস্কৃতিক এক অনুষ্ঠান ৷’’
