কৰিমগঞ্জ , ২৪ জুন: অসম-ত্ৰিপুৰা সীমান্তত ত্ৰিপুৰা আৰক্ষীয়ে অভিযান চলাই এখন গেছ চিলিণ্ডাৰ কঢ়িওৱা ট্ৰাকৰ পৰা 35 হাজাৰ ইয়াবা (নিচা জাতীয়) টেবলেট জব্দ কৰে । ত্ৰিপুৰা সংযোগী চান্দখিৰা কাঠলতলী বিকল্প ৰাষ্ট্ৰীয় ঘাইপথটোৰে ট্ৰাকখনে ত্ৰিপুৰাত প্ৰৱেশ কৰাৰ সময়তে আৰক্ষীয়ে জব্দ কৰে ট্ৰাকখন ।
কৰিমগঞ্জত মাদকদ্ৰৱ্য বিৰোধী অভিযান যিমানেই ক্ষীপ্ৰ হৈ পৰিছে, সিমানেই নিচাযুক্ত সামগ্ৰী সৰবৰাহকাৰী চক্ৰই ন ন পন্থা অৱলম্বন কৰি নিচা জাতীয় সামগ্ৰী সৰবৰাহ কৰিবলৈ লৈছে । তেনে সময়তে এক গোপন সূত্ৰৰ পম খেদি আৰক্ষীয়ে অভিযান চলাইছিল । এই অভিযানত আৰক্ষীয়ে এখন ট্ৰাকত তালাচী চলাই ট্ৰাকখনৰ ভিতৰত থকা এটা গোপন কেবিনৰ পৰা 35 হাজাৰ ইয়াবা টেবলেট জব্দ কৰে । এই সন্দৰ্ভত আৰক্ষীয়ে ট্ৰাক খনৰ চালক জমিৰ উদ্দিন আৰু হেণ্ডিমেন বদৰুল হকক গ্ৰেপ্তাৰ কৰে । দুয়োৰে ঘৰ কৰিমগঞ্জ জিলাৰ নিলামবজাৰ আৰক্ষী থানাৰ অন্তৰ্গত লোহাৰপাৰা গাঁৱত জানিব পৰা মতে চিলিণ্ডাৰ কঢ়িওৱা ট্ৰাক খন শিলচৰৰ পৰা ত্ৰিপুৰাৰ তেলিয়ামুৰাৰ অভিমুখে গৈ আছিল । ইপিনে ধৃত লোকদ্বয়ে দিয়া তথ্য অনুসৰি পাথাৰকান্দিৰ পৰা টেবলেটখিনি দহ হাজাৰ টকাৰ বিনিময়ত তেওঁলোকে গাড়ীত তুলিছিল। কিন্তু কোন স্থানত আৰু কোনে টেবলেটখিনি সংগ্ৰহ কৰিব সেয়া তেওঁলোকে জনা নাছিল । উল্লেখ্য যে এই নিচাযুক্ত সামগ্ৰী সৰবৰাহকাৰী দলটোৰ নেটৱৰ্ক বৰাক উপত্যকাৰ পৰা উত্তৰ ত্ৰিপুৰা লৈকে সক্ৰিয় হৈ আছে। আৰু চক্ৰটোৱে কৰিড'ৰ হিচাপে বাছি লৈছে চান্দখিৰা কাঠলতলী বিকল্প ৰাষ্ট্ৰীয় ঘাইপথ । । বৰ্তমান দুই চালক আৰু হেণ্ডিমেন ত্ৰিপুৰাৰ কদমতলা আৰক্ষীৰ জিম্মাত আছে আৰু দুয়োকে জেৰা অব্যাহত ৰাখিছে ত্ৰিপুৰা আৰক্ষীয়ে ।
