কৰিমগঞ্জ, 10 জানুৱাৰী : কৰিমগঞ্জ জিলাৰ কালিগঞ্জৰ কাকৰা নদীত 5 জানুৱাৰীত বান্ধিথোৱা অৱস্থাত উদ্ধাৰ হয় এগৰাকী যুৱতীৰ অৰ্ধনগ্ন মৃতদেহ । আৰক্ষীয়ে ঘটনাৰ তদন্ত অব্যাহত ৰাখি মৃতদেহটো 3 জানুৱাৰীত কৰিমগঞ্জ জিলাৰ কালিগঞ্জ আৰক্ষী চকীত নিজ জীয়ৰীৰ নিৰুদ্দেশৰ এজাহাৰ দাখিল কৰা চৌকিৰমুখ এজন লোকৰ জীয়ৰীগৰাকী বুলি চিনাক্ত কৰে ৷ আৰক্ষীয়ে মৃতদেহটো চিনাক্তকৰণৰ পাছত মৰণোত্তৰ পৰীক্ষাৰ বাবে কৰিমগঞ্জ অসামৰিক চিকিৎসালয়লৈ প্ৰেৰণ কৰি ঘটনাৰ তদন্ত আৰম্ভ কৰে ।
অৱশেষত আৰক্ষীয়ে ঘটনাৰ তদন্তত সাফলতা লাভ কৰি শুকুৰবাৰে চাৰি অভিযুক্তৰ তিনি অভিযুক্তক আটক কৰিবলৈ সক্ষম হয় । আৰক্ষীয়ে এই ঘটনা সংঘটিত কৰা MZ 06-1481 নম্বৰৰ চুমু গাড়ীখনো জব্দ কৰে ৷ আটকাধীন অভিয়ুক্তকেইটা ক্ৰমে ফয়জুল মিঞা, ছাদ্দাম হুছেইন আৰু আজমল হুছেইন । আৰক্ষীৰ যুৱককেইজনে যুৱতীগৰাকীক ধৰ্ষণ কৰি হত্যা কৰাৰ সন্দেহ কৰিছে । আনহাতে অভিযুক্ত কেইটাই তেওঁলোকৰ মাজৰ ফয়জুল মিঞাই যুৱতীগৰাকীক ভাল পাই বিয়াৰ বাবে পলোৱাই নিয়াৰ সময়ত গাড়ীখন দুৰ্ঘটনাগ্ৰস্ত হৈ যুৱতীগৰাকীৰ মৃত্যু হোৱা বুলি উল্লেখ কৰে । ধৃত যুৱককেইজনে ভয়তে যুৱতীগৰাকীৰ মৃতদেহ বান্ধি নৈত পেলাই দিছিল বুলি উল্লেখ কৰে । কিন্তু যুৱককেইজনৰ শৰীৰত কোনো ধৰণৰ আঘাটৰ চিন নথকাত আৰু গাড়ীখনৰো কোনো ক্ষতি নোহোৱালৈ লক্ষ্য কৰি এইয়া এক হত্যাকাণ্ডহে বুলি সন্দেহ কৰিছে ৷
